![Basha për dorëheqjen e Haradinajt: Askush nuk e përdhos luftën e UÇK-së](https://insajderi.com/wp-content/uploads/2019/07/basha-haradinaj-730x440.jpg)
Kryetari i PD-së në Shqipëri, Lulzim Basha, ka reaguar pas dorëheqjes së kryeministrit Ramush Haradinaj, shkruan Insajderi.
Basha ka deklaruar se dorëheqja është një akt i një njeriu që vë atdheun mbi të gjitha.
“Dorëheqja e kryeministrit Ramush Haradinaj është akti i një njeriu që vë atdheun mbi gjithçka. Ramushi i ka shërbyer gjithmonë me vetëmohim Kosovës, në ditë të mira dhe në ditë të këqija. Ramush Haradinaj është Kosova – Kosova e lirë, Kosova e pavarur, Kosova europiane”, deklaroi Basha.
Kreu i PD-së ka thënë se askush dhe asgjë nuk e përdhos luftën çlirimtare të Kosovës.
“Askush dhe asgjë nuk e përdhos dot luftën çlirimtare të Kosovës dhe sakrificën sublime të familjes Haradinaj në altarin e lirisë”, përfundoi Basha.
Haradinaj dha dorëheqje si kryeministër i Kosovës pasi është ftuar nga Gjykata Speciale.