Komisioni Evropian ka ndarë 24 milionë euro si asistencë buxhetore për Kosovën, transmeton Insajderi.
Kjo është bërë e ditur nga Zyra e Bashkimit Evropian në kosovë, në njoftimin e të cilës thuhet se këto fonde janë pjesë e asistencës së përgjithshme të Be-së për të zbutur ndikimin e COVID-19.
“Në dhjetor 2020, në Thesarin e Kosovës është paguar një shumë prej 24.05 milionë euro si fonde të asistencës buxhetore të ofruara nga Komisioni Evropian. Këto fonde janë pjesë e asistencës së përgjithshme të BE-së për të zbutur ndikimin e COVID-19, për të mbështetur modernizimin e administratës publike të Kosovës dhe për të forcuar menaxhimin e financave publike”, thuhet në komunikatën e BE’së.
BE do të vazhdojë mbështetjen e Kosovës me fonde shumë të nevojshme për të zbutur ndikimin socio-ekonomik të krizës së COVID-19 mbi popullsinë dhe bizneset e Kosovës.
Komisionari për Fqinjësinë dhe Zgjerimin, Olivér Várhelyi tha se “Kosova dhe BE-ja janë të dyja akoma në mes të pandemisë. Përmes këtyre pagesave të mbështetjes buxhetore, ne ndihmojmë Kosovën të ndërmarrë veprimet e nevojshme për të luftuar pandeminë: të ndihmojë stabilizimin e financave publike, t’i ofrojë mbështetje bizneseve të vogla dhe qytetarëve nevojtarë për t’ia dalë mbanë vështirësive financiare me të cilat përballen në këtë situatë të vështirë. Ne qëndrojmë pranë popullit të Kosovës” .
Mbështetja buxhetore është një formë e mbështetjes nga BE-ja, ku Blloku shpërblen përparimet që shënojnë qeveritë në zbatimin e strategjive të veta dhe në arritjen e synimeve që i kanë vënë vetes. Pagesat e mëparshme të BE-së lidhur me administratën publike dhe reformat e menaxhimit të financave publike në shumën prej 11.5 milionë euro dhe 9.97 milionë euro, u disbursuan në dhjetor 2019 dhe korrik 2020, përkatësisht. /Insajderi.com
