![Berisha: Nuk i kam ndryshuar mendimet për LDK-në, por VV-ja e teproi dje në Kuvend](https://insajderi.com/wp-content/uploads/2020/04/auto_beke-berisha-730x4401570565310-1-730x440.jpg)
Deputeti i Kuvendit të Kosovës nga radhët e Aleancës për Ardhmërinë e Kosovës, Bekë Berisha, ka komentuar veprimin e djeshëm të Lëvizjes Vetëvendosje ndaj zëvendëskryeministrit të Kosovës, Driton Selmanaj, njofton Insajderi.
Berisha në një prononcim për media, e ka cilësuar si të tepruar kundërshtimin e deputetëve të VV-së për pjesëmarrjen e Driton Selmanajt në seancën e Kuvendit të Kosovës.
Ai ka thënë se Selmanaj nuk kishte për qëllim ofendimin e Saranda Bogujevcit.
“Mendoj që ka qenë e tepruar, e kemi trajtuar atë temë dhe nuk ka pas për qëllim Driton Selmanaj me ofendu atë vajzën (Saranda Bogujevcin), mirëpo kjo u bë pastaj prej mediave shkoj në drejtim, e këta nuk po dinë me u ndal tash. Po m ‘duket që është e tepërt”, tha Berisha.
Dy ditë më parë, kryeministri i Kosovës, Avdullah Hoti ka kërkuar lirimin nga detyra të shefit të Agjencisë Kosovare për Inteligjencë (AKI), Kreshnik Gashi. E për këtë Berisha thotë se ende nuk e kanë parë raportin se pse atij iu kërkua lirimi i detyrës.
Ndërsa thotë se nuk mund të vlerësojë nëse është i drejtë apo jo.
Berisha rreth dy vite më parë, deputetët e partnerit të koalicionit, LDK-së, i pati përshkruar si të çrregullt dhe se i mbushin xhepat me para.
I pyetur nëse e ka ende mendimin e njëjtë për partnerët e koalicionit, ai ka thënë se mendimet nuk i ka ndryshuar, por nuk dëshiron që në këtë kohë t’i komentojë deklarata që i ka thënë më parë.
“Unë i kam thonë ato në kohën kur i kam thënë. Mendimet nuk i ndryshoj, mirëpo pak po më duket e tepërt me i komentuar d.m.th. deklaratat që i kam thënë”, thotë Berisha./Insajderi.com