Ministri i Bujqësisë, njëherësh edhe zëdhënësi i Lidhjes Demokratike të Kosovës, Besian Mustafa, e ka kujtuar në 20 vjetorin e vrasjes babain e tij, ish-zyrtarin e LDK-së, Xhemail Mustafën, transmeton Insajderi.
Me anë të një postimi në Facebook, Mustafa ka shkruar se mos zbardhja e vrasjeve mbetet dështim i drejtësisë së Kosovës, që nga UNMIK’u deri më sot.
“20 vjet! Mos-zbardhja e vrasjeve të atdhetarëve pasluftës dhe mos-dënimi i vrasësve dhe, mbi të gjitha, urdhërdhënësve mbetet dështimi themeltar i sistemit të drejtësisë në Kosovë, që nga UNMIK-u e deri sot”, thotë ai.
Ministri Mustafa ka thënë se pa zbardhjen e këtyre vrasjeve nuk mund të ketë drejtësi në vend.
“Pa zbardhjen e këtyre vrasjeve dhe atentateve të panumërta, nuk mund të ketë drejtësi në këtë vend, e pa drejtësi, as liri të plotë”, ka thënë ai. /Insajderi.com
