Brenda 10 minutave filialet e dy bankave në Prishtinë janë grabitur. Njëri rast ka ndodhur në kryëzimin e rrugës “Bill Clinton”, ndërsa tjetri në kryqëzimin e rrugëve “Edmond Hoxha” dhe “Hajrullah Abdullahu”, njofton Insajderi.
Kështu ka bërë të ditur për Insajderin zëdhënësi i Policisë për Rajonin e Prishtinës, Agron Borovci.
Për grabitjen te “Bill Clintoni”, Borovci ka thënë se bazuar në informacionet e para dyshohet se grabitja është kryer nga një person.
“Rreth orës 10:40 është raportuar për një grabitje të ndodhur në filialin e një institucioni financiar për transferta ndërkombëtare në kryqëzimin e rrugën “Bill Klinton” në Prishtinë. Policia ka dalë në vendngjarje dhe nga informacionet e para dyshohet që grabitja të jetë kryer nga një person. Policia ka filluar hetimet bashkë me ndërmarrjen e veprimeve të nevojshme policore me qëllim ndriçimin e rastit”, ka thënë Borovci.
Edhe grabitja në kryqëzimin e rrugëve “Edmond Hoxha” dhe “Hajrullah Abdullahu” dyshohet të jetë kryer nga një person, i cili sipas policisë, ka qenë i armatosur.
“Rreth orës 10:30 është raportuar për një grabitje të ndodhur në filialin e një institucioni financiar për transferta ndërkombëtare në kryqëzimin e rrugëve “Edmond Hoxha” dhe “Hajrullah Abdullahu” në Prishtinë . Pas marrjes së informacionit policia ka dalë në vendngjarje dhe bazuar në informacionet e para dyshohet që grabitja të jetë kryer nga një person i cili po ashtu dyshohet të ketë qenë i armatosur. Policia ka iniciuar një hetim lidhur me rastin dhe ka nisur me ndërmarrjen e veprimeve të nevojshme policore me qëllim zbardhjen e rastit”, ka deklaruar Borovci./Insajderi.com
