30 ditë arrest shtëpiak është masa që i është caktuar të pandehurit A.G., nga Gjykata Themelore në Gjilan, i cili dyshohet se ka kryer abort ndaj të miturës 13 vjeçare, njofton Insajderi.
Kështu është bërë e ditur në një njoftim nga kjo gjykatë, ku thuhet se është aprovuar kërkesa e Prokurorisë Themelore të Gjilanit, për caktimin e masës së arrestit shtëpiak për të pandehurin.
Ekziston dyshimi i bazuar se i pandehuri në cilësinë e mjekut gjinekolog, në ordinancën e tij, ka kryer abortin ndaj të miturës, me ç’rast i njëjti ka treguar vendosmëri në kryerjen e veprave penale pasi që i kishte diktuar të dëmtuarës se çfarë të shkruaj në deklaratën e saj për dhënien e pëlqimit për kryerjen e abortit.
Gjithashtu i pandehuri gjatë kontrollit të dëmtuarës, nuk e ka lajmëruar veprën penale të dhunimit.
Me këto veprime i pandehuri A. G. dyshohet se ka kryer veprat penale ‘’ndërprerja e shtatzënisë’’ dhe “moslajmërimi i veprave penale dhe kryerësve të tyre”, vepra të sanksionuara me Kodin Penal të Republikës së Kosovës (KPRK), shkruan EO.
Ndryshe, me datë 29.09.2020, Gjykata ka caktuar masën e paraburgimit prej një muaji ndaj dy të pandehurve, të cilët dyshohet se kanë dhunuar të miturën. /Insajderi.com
