Në seancën për votimin e mocionit të mosbesimit për rrëzimin e Qeverisë Kurti, ka pasur përplasje në mes të deputetëve të VV-së dhe AAK-së.
Një ndër përplasjet ishte ajo e deputetes së VV-së Mimoza Kusari-Lila me deputetin e AAK-së Daut Haradinaj.
Në këtë pikë, u rikthye në memorie një vizitë e Behgjet Pacollit me një “delegacion” të madh prej 128 vetash, në vitin 2010 në Libi, e cila ende udhëhiqej nga diktatori Gaddafi, një kolonel i shkolluar në Jugosllavi, shkruan Gazeta Insajderi.
Sa i përket kësaj, ndër të tjera Haradinaj, i tha Kusari-Lilës, se ai nuk ka nevojë të vallëzojë para Gaddafit, e sipas tij, për patriotizëm të gjithëve në Kuvend u mbanë shkollë.
“Për patriotizëm personal shkollë ju maj të gjithëve, një nga një. Unë nuk ju vallëzoj Gaddafave edhe nuk kam nevojë me mar yrysh anej”, ka thënë Haradinaj.
E një deklaratë të tillë drejtuar Kusari-Lilës, e pati bërë edhe vëllai i tij, ish-kryeministrit Ramush Haradinaj.
Në postin e kryeministrit, Haradinaj, ia pati kujtuar bashkëpunëtores së dikurshme të Pacollit, Mimoza Kusarit, vallëzimin para diktatorit.
Por, çfarë kishte ndodhur në Libi në vitin 2010-të realisht:
Një vizitë në kontinentin e nxehtë afrikan e realizuar në vitin 2010 vazhdon të prodhojë debate të nxehta në skenën politike të Kosovës. Udhëtimi që ishte sponsorizuar nga kreu i AKR-së, Behgjet Pacolli, i cili kishte dërguar rreth 130 veta në Tripoli, përfshirë shumë bashkëpunëtorë të tij, e më pas edhe në vendlindjen e Gaddaffit, kishte për qëllimin të animonte diktatorin libian me zhvillimet në Kosovë. Më saktësisht atje kërkohej njohja e pavarësisë së Kosovës.
Por, jo gjithçka kishte shkuar si duhet. Diktatori libian botërisht njihej për teket e tij. Ai i kishte kërkuar delegacionit që të vallëzojnë pandërprerë. Pas kthimit nga Tripoli pjesëmarrësit e “pelegrinazhit” në Libi kishin zbuluar detaje të udhëtimit të famshëm.
E vizita nuk u kishte shpëtuar edhe mediave ndërkombëtare. Gazeta “The Economist” kishte raportuar rreth episodit poshtërues të vitit 2010, të delegacionit të AKR-së në Libi.
“Në Ballkan u diskutua gjatë kur Pacolli dërgoi një delegacion të madh të kosovarëve në Libi, si pjesë e përpjekjes për t’ia ndryshuar orientimin pro-serb, dhe për ta bërë atë që të njohë pavarësinë e Kosovës. Në një pikë të agjendës, i gjithë delegacioni u dërgua në mes të shkretëtirës për ta takuar liderin libian.
Me të arritur, Gadafi urdhëroi ata që të këndonin dhe të kërcenin. Kur ata u lodhën dhe u ndalën, u qortuan nga një ndihmës. Më vonë koloneli i mirë u tha se mund të ndalonin, para se t’i linte për të shtuar se ai kurrë nuk do ta njohë pavarësinë e Kosovës derisa liderët e tyre vazhdojnë të mbesin kukulla të Amerikës. Me këtë kosovarët e poshtëruar u kthyen në shtëpi”, shkruante Economist.
E në Kosovë, i gjithë vallëzimi identifikohej me Mimoza Kusari –Lilën, pavarësisht se atje Pacollin e shoqëronin pothuaj të gjithë këshilltarët e tij. Kusari -Lila disa herë është detyruar të japë shpjegime rreth vallëzimit të famshëm në Libi me muzikë të Shkëlzen Jetishit.
Thuhet se delegacioni atëkohë kishte marrë porosi në fillim që të mos i merrnin me vete telefonat dhe aparatet fotografike, për faktin se përdorimi i tyre nuk ishte i lejuar brenda tendës së Gaddafit. Libia ka njohur Kosovën në vitin 2013 pas rënies së diktatorit./ Insajderi.com
