Bekim Çollaku – bashkëpunëtori më i afërt i ish-presidentit të Kosovës, Hashim Thaçi, ka bërë të ditur se ky i fundit ishte intervistuar nga Zyra e Prokurorit të Specializuar të Hagës në fillim të vitit 2020, transmeton Insajderi.
Kështu është deklaruar Çollaku në ‘Rubikon’ të Klan Kosovës, derisa shtoi se Thaçi e ka konsideruar si të vonuar dorëheqjen e tij nga pozita e presidentit pas ftesës që kishte pranuar nga Specialja.
“Presidenti Thaçi ka mundur të mos japë dorëheqje, nuk ka asnjë bazë ligjore që ia imponon një zyrtari të shtetit këtë, pas ngritjes së një aktakuze. Ai e ka konsideruar si të vonuar dorëheqjen e tij, duke e llogaritur se duhej të jepte dorëheqje në momentin kur kishte marrë ftesën e parë nga kjo Gjykatë për t’u intervistuar. Ai e ka vendosur interesin shtetëror para duke dhënë dorëheqje, kjo në formë për të mos i dëmtuar institucionet e Kosovës”, ka thënë Çollaku.
“Thaçi në fillim të vitit 2020 kishte marrë ftesë nga Haga për t’u intervistuar, ai ka dhënë intervistë atëherë dhe kjo është bërë e ditur në dokumentet zyrtare që janë të publikuara”, shtoi ai. /Insajderi.com
