Dekanati i Fakultetit të Edukimit ka përdorur faqen zyrtare të Fakultetit të Edukimit për t’iu kundërvënë profesoreshës së këtij fakulteti, Valbona Berishës, pasi ajo deponoi kallëzim penal në Prokurorinë e Shtetit kundër dekanit Ethem Çeku dhe rektorit Marjan Dema.
Përmes një komunikate për medie, Dekanati i Fakultetit të Edukimit i ka quajtur të pavërteta pretendimet e profesoreshës Berisha të deponuara në Prokurori dhe të publikuara në Gazetën Insajderi.
Madje, Dekanati ka shprehur shqetësim se këto veprime kanë për qëllim “dëmtimin e sukseseve” të fakultetit.
“Universiteti i Prishtinës shpreh shqetësimin dhe indinjatën lidhur me shkrimet tendencioze dhe të pavërteta në media, që kanë për qëllim dëmtimin e progresit dhe sukseseve që ka arritur ky fakultet në vitet e fundit”, thuhet në reagimin e Dekanatit të Fakultetit të Edukimit.
Dekanati i Fakultetit të Edukimit, i cili akuzohet nga profesoresha Valbona Berisha për falsifikim të dokumenteve në rastin e diplomimit të studentes me inicialet A.R. në Fakultetin e Edukimit, ka mbrojtur diplomimin e dyshimtë të studentes A.R..
“Sipas dosjes zyrtare të studentes A.R. (e cila mund të shikohet në çdo kohë sipas procedurave për çasje në dokumente zyrtare), studentja i ka të dhëna të gjitha provimet sipas procedurave statutare dhe rregullores së studimeve”, thuhet në komunikatën e Dekanatit të FE-së.
“Provimin ‘kontestues’ sipas artikullit [të Insajderit, v.j], studentja e ka përfunduar pas një viti te profesoresha tjetër e të njëjtës lëndë, e cila ka kompetencë dhe përvojë shumë të gjatë në atë lëndë”, ka thuhet në komunikatë.
Insajderi ka qëndruar në Fakultetin e Edukimit të martën e 12 korrikut, kur kishte mbrojtur temën e diplomës studentja A.R.. Pikërisht në ditën e diplomimit të studentes A.R. dhe qëndrimit të Insajderit në Fakultetin e Edukimit, profesoresha Valbona Berisha kishte marrë kërcënime nga stafi i Ethem Çekut.
“Po doli diçka në publik, do të ngriten procedura ndaj teje”, ishte mesazhi drejtuar asaj.
Por ky kërcënim, sipas Dekanatit të Fakultetit të Edukimit, nuk ka qenë asgjë më shumë se kërkesë “që kamerat në institucionet nuk mund të ftohen me ftesë private nga secili mësimdhënës.”
“Gjithashtu, i ashtuquajturi ‘kërcënim’ ndaj prof. Berisha, nuk ka qenë asgjë më shumë se kërkesë që kamerat në institucion, nuk mund të ftohen me ftesë private nga secili mësimdhënës”, thuhet në reagimin e Dekanatit të FE-së.
Dekanati i Fakultetit ka thënë se atë ditë në fakultet kanë qenë prezente shumë media të cilat vetë fakulteti i ka ftuar për hir të transparencës, me rastin e mbrojtjes së temave të diplomave të studentëve.
Mirëpo, Insajderi, që qëndroi atë ditë në hapësirat e Fakultetit të Edukimit, nuk u lejua të merrte pjesë në diplomimin e studentes A.R. më 12 korrik rreth orës 10:00.
Insajderi raportoi të mërkurën për kallëzimin penal që profesoresha Valbona Berisha ngriti ndaj dekanit Ethem Çeku e rektorit Marjan Dema lidhur me diplomimin e dyshimtë të studentes A.R. në Fakultetin e Edukimit.
Insajderi ka publikuar kallëzimin penal që profesoresha Berisha ka deponuar në Prokurorinë e Shtetit ndaj Çekut, Demës dhe dy zyrtarëve të tjerë të Universitetit të Prishtinës. /Insajderi.com
