Bedri Hamza nuk është që nga dje ministër i Financave në detyrë. Kjo pasi që politikani nga Mitrovica ka dhënë betimin si deputet dhe Kushtetuta nuk ia lejon më pozicionin e më hershëm.
Hamza që mori votat për të qenë deputet i Partisë Demokratike të Kosovës nga zgjedhjet e 6 tetorit, ka thënë se dje i ka shkruar shkresë kryeministrit në detyrë, Ramush Haradinajt në shenjë falënderimi.
“Kjo nuk do të thotë se unë kam dhënë dorëheqje nga posti i ministrit në detyrë pasi që këtë e rregullon Kushtetuta dhe Rregullorja e Punës së Kuvendit. Në momentin kur ti kalon në Kuvend nuk mundesh mbajt edhe postin e ministrit, kjo nuk po ndodh për herë të parë”, ka thënë Hamza për Indeksonline.
Tutje Hamza ka shtuar se “Po ua rikujtoj se e njëjta ka ndodhur edhe në mandatin e kaluar. P.sh, kur z.Hoti ishte ministër i Financave në momentin kur është certifikuar si deputet dhe e ka dhënë betimin atëherë ai ka qëndruar në Kuvend”
Po ashtu ai ka thënë se “ndërsa ish-kryeministri z.Mustafa e ka emëruar Agim Krasniqin ministër të Financave. Dhe në këtë drejtim unë kam vepruar në përputhje me Kushtetuten e Republikës së Kosovës dhe Rregulloren e Punës së Kuvendit, për më tepër si shenjë falënderimi për bashkëpunimin që kemi pas unë kam shkruar një shkresë Kryeminisrit. Unë jam deputet i Republikës së Kosovës dhe shef i grupit parlamentar i PDK-së” ka thënë Bedri Hamza.
