Pas grevave të minatorëve të Trepçës, mjekëve kirurgë dhe mësimdhënësve, edhe shërbyesit civilë kanë paralajmëruar nisjen e një greve të martën. Këta punëtorë të administratës po kërkojnë nga Qeveria e Kosovës rritjen e koeficientet përmes Ligjit për Paga, si dhe njohjen e përvojës së punës të nëpunësve civilë gjatë viteve 1990-99.
Rreth 23 mijë shërbyes civilë pritet që nesër të hyjnë në grevë një orëshe duke filluar nga ora 10:00 deri në 11:00, por kanë kërcënuar se nëse nuk plotësohen kërkesat e tyre atëherë do të hyjnë edhe në grevë të përgjithshme.
E për futjen në grevë të më shumë se tre sektorëve të shtetit, deputetët e AAK-së kanë shprehur dyshime se dikush qëndron prapa këtyre zhvillimeve; se disa prej këtyre grevave janë të orkestruara.
Një dëshmi se greva e paralajmëruar e shërbyesve civilë ka prapavijë të dyshimtë është fakti që përfaqësues i Këshillit Grevist të Shërbyesve Civilë është Ali Sefaj, ish-militant i Partisë Demokratike të Kosovës, i afërt me tashmë presidentin Hashim Thaçi.
Sefaj, një njeri i afërt i presidentit Thaçi, ishte shpërblyer në mënyrë të dyshimtë nga Thaçi – në kohën kur ai shërbente si kryeministër i vendit – në vitin 2009, kur me vendim të asokohe shefit të ekzekutivit ishte emëruar kryesues i Bordit të Kompanisë së Ujitjes “Drini i Bardhë”. Insajderi ka siguruar vendimin e ish-kryeministrit Hashim Thaçi, përmes së cilit kishte nënshkruar për emërimin e Ali Sefajt si kryesues të Bordit të Ujitjes “Drini i Bardhë”.
“Në Bordin e Ndërmarrjes Publike, Kompania e Ujitjes ‘Drini i Bardhë’ emërohen këta kandidatë: 1. Ali Sefaj – kryesues, 2. Fadil Kabashi, 3. Beqir Metaj, 4. Shkodran Gaxherri”, thuhej në vendimin e lëshuar nga Zyra e Kryeministrit të Kosovës më 23 prill të vitit 2009, të nënshkruar nga kryeministër Hashim Thaçi.
Paraprakisht, asokohe kryeministri Thaçi kishte anuluar vendimet për emërimin e anëtarëve të Bordit të kësaj Ndërmarrjeje Publike, të zgjedhur në muajin prill të vitit 2008. Një vit më vonë, përmes ndryshim-vendimit për anëtarët e Bordit të Kompanisë së Ujitjes “Drini i Bardhë”, ai kishte emëruar Ali Sefajn në pozitën e kryesuesit të Bordit të Ndërmarrjes.
Mirëpo, Sefaj ishte larguar nga pozita e kryesuesit të Bordit të Kompanisë së Ujitjes “Drini i Bardhë” me vendim të Zyrës Civile Ndërkombëtare në Kosovë, e cila kishte mandatin të mbikëqyrte pavarësinë e Kosovës dhe të kujdesej që Plani i Ahtisarit të zbatohej në tërë territorin e vendit.
Tash si përfaqësues i Këshillit Grevist të shërbyesve civilë, Sefaj tha se po kërkojnë që përmes këtij ligji të trajtohen barabartë me punëtorët e sektorëve të tjerë. Ai tha se nuk duan ta paralizojnë shtetin, por kërkojnë reflektim ndaj kërkesave të tyre.
“Qëllimi i grevës është masë e vogël paralajmëruese e karakterit sindikal që institucionet qendrore t’i përmbushin minimalisht dy kërkesat të cilat i kanë shërbyesit civilë. Shërbyesit civilë kërkojnë nivelizim të pagave me sektorët tjerë, kemi një rritje të premtuar mirëpo nuk e kemi të shkruar dhe të dhënë si ofertë dhe kemi stazhin e shërbyesve civilë të cilët kanë punuar në vitet e 90-ta që politikisht janë larguar nga marrëdhënia e punës, e sot nuk e gëzojnë të drejtën e pensionit për faktin se iu mungojnë dy tre, pesë muaj, apo një vit përvojë pune”, u shpreh ai.
“Ne kemi kërkuar që koeficienti të rritet dhe të jetë i barasvlefshëm me institucionet tjera dhe me sektorët tjerë. Ne i mirëkuptojmë mundësitë buxhetore që ka shteti, mirëpo kërkojmë reflektim, ne nuk dëshirojmë ta paralizojmë apo ta bllokojmë shtetin, mirëpo ne mendojmë që ushtarët e shtetit janë administrata publike dhe shteti duhet të reflektoj karshi kërkesave të tyre me mundësitë buxhetore “, u shpreh Sefaj.
Sipas tij, pa e marrë ofertën e shkruar nga Qeveria, ofertë në të cilën përfshihen kërkesat e tyre ata nuk do të zmbrapsen nga greva e paralajmëruar. /Insajderi.com
