Janë publikuar rezultatet e edicionit të janarit, të ranglistës së universiteteve botërore Webometrics. Bazuar në këto rezultate, listës së universiteteve të Kosovës, sërish i prijnë Universiteti i Prishtinës dhe Kolegji AAB.
Krahasuar me edicionin e muajit korrik 2017, kur kishte pësuar rënie në rangimin e universiteteve botërore, sipas Webometrics, Universiteti i Prishtinës këtë radhë ka arritur të përmirësojë pozicionin e vet duke u ranguar për 640 vende më lartë në listë.
Sipas rezultateve të shpallura sot, në këtë ranglistë, lider i arsimit jopublik të Kosovës, vazhdon të mbetet Kolegji AAB, i cili pozicionimin e vet në raport me universitetet botërore e ka përmirësuar për 1107 vende, duke mbajtur kështu edhe pozicionin më të mirë të të gjitha institucioneve jopublike në rajon.
Ndërkohë, institucionet tjera të Kosovës, publike e private, as në këtë edicion nuk kanë arritur të pozicionohen në 10 mijë pozitat e para.
Ndryshe, Universiteti i Prishtinës dhe Kolegji AAB, mbeten të vetmet institucione shqiptare të cilat në rangimet që bën Webometrics, ditë më parë kanë arritur të futen edhe në mesin e 5 mijë universiteteve botërore të ranguara sipas citimeve në Google Scholar.
Nga universitetet e Shqipërisë, më së miri janë ranguar Universiteti Bujqësor dhe Universiteti Politeknik, duke lënë prapa Universitetin e Tiranës, ndërsa Universiteti Shtetëror i Tetovës rangohet si i shtati në Maqedoni.
Ranglista e universiteteve botërore sipas Webometrics, shpall rezultatet dy herë në vit, në janar dhe në korrik ndërsa në të përfshihen rreth 30 mijë universitete botërore. Në tri pozitat e para të kësaj rangliste janë radhitur: Universiteti i Harvardit, Universiteti i Stanfordit dhe Universiteti i Masaçusetsit.
Për më shumë ndiqni kronikën e transmetuar në RTK:
