Ndërsa forcat ruse u mbyllën në Hostomel në fund të shkurtit, kryebashkiaku i qytetit Yurii Prylypko u kërkoi banorëve vendas të kujdeseshin për njëri-tjetrin raporton CNN.
“Unë jam këtu me ju. Ne duhet të rezistojmë,” tha ai në një video-mesazh. “Armët po vijnë. Ushtarët tanë po vijnë. Ne do ta kalojmë këtë. Ne vetëm duhet të ruajmë qetësinë dhe të mbrojmë njerëzit rreth nesh. Faleminderit!”
Ditë më vonë, Prylypko vdiq. Ai dhe një civil tjetër, Ivan Zorya, u vranë nga ushtarët rusë, thonë dëshmitarët okularë, teksa ata u përpoqën të shpërndanin ilaçe dhe furnizime të tjera për njerëzit në komunitet. Një tjetër civil, Oleksandr Karpenko, u vra gjatë përpjekjes për t’i shpëtuar ata.
Rusia ka mohuar vazhdimisht se ka shënjestruar civilët gjatë pushtimit të saj në Ukrainë.
Por fotot e skenës të marra pas saj dhe imazhet e kapura nga kamerat e sigurisë në ditën e sulmit e bëjnë të qartë se kryebashkiaku po udhëtonte me një makinë civile kur trupat ruse hapën zjarr. Në atë moment, sipas dëshmitarëve okularë, aty pranë nuk kishte makina apo automjete të tjera ushtarake.
CNN ka kërkuar një koment zyrtar nga Ministria ruse e Mbrojtjes për vrasjet në Hostomel, por nuk ka marrë përgjigje./Insajderi.com
