Drejtoresha e Arsimit në Komunën e Prishtinës, Shpresa Shala, është deklaruar rreth fillimit të gjysmëvjetorit të dytë në shkollat e kryeqytetit, njofton Insajderi.
Ajo thotë se ky gjysmëvjetor ka nisur mbarë, duke shtuar se mësimi ka filluar në të gjitha shkollat në përjashtim të tri prej tyre të cilat kanë probleme të vogla pas reshjeve të shiut.
“Mësimi ka filluar në të gjitha shkollat në përjashtim të tri prej tyre. Ka qenë periudhë e lehtë. Janë bërë të gjitha përgatitjet, duke përfshirë dezinfektimin dhe pastrimin gjeneral të objekteve shkollore. Kemi pajisur shkollat me materiale higjenike shtesë dhe me të gjitha ato që i duhen”, ka thënë Shala, raporton KK.
“Në shkollën ‘Ahmet Gashi’ ka renovime. Kemi kërkuar që të ndërpritet renovimi dhe të fillojë mësimi por prindërit e kanë parë më të arsyeshme që të përfundojnë renovimet dhe të fillojë mësimi. Shkolla e muzikës dhe shkolla në Hajvali kanë pas pak dëmtime nga shiu. Dje është kthyer mësimi në Hajvali ndërkaq në shkollën e muzikës pritet të fillojë”.
Shala tha se shkollat qëndrojnë mirë edhe me ngrohje.
“Me ngrohje jemi mirë, kemi mjaftueshëm lëndë djegëse. Shkollat që janë me termokos, kanë gjendjen shumë të mirë por me shpenzime më të mëdha se sa në shkollat që janë me pelet”. /Insajderi.com
