Deputetja nga radhët e komunitetit jo-shumicë, Duda Balje, ka publikuar një fotografi me kandidaten për presidente, Vjosa Osmanin, duke thënë se është në “pritje madhështore” të seancës së Kuvendit për votimin e saj, njofton Insajderi.
Balje, duke iu referuar si presidente Osmanit, nëpërmjet ‘Facebook’-ut, është shprehur krenare me formimin e institucioneve të vendit.
“Si gjithëherë krenare me formimin e institucioneve të shtetit tim! Në pritje madhështore të votimit të Presidentes tonë! Zoti e bekoft popullin e Kosovës !”, ka shkruar ajo në postim.
Përkundër se nga Vetëvendosja është thënë se janë siguruar nënshkrimet e 40 deputetëve për inicimin e seancës për votimin e presidentit, një seancë e tillë ka dështuar të mbahet sot. Kryeministri Albin Kurti ka propozuar ndryshimin e Ligjit për Zgjedhjet e Përgjithshme përpara votimit të presidentit./Insajderi.com
