Vdekja e sotme e aktivistit të Lëvizjes Vetëvendosje në burgun e Prizrenit, Astrit Dehari, nuk është humbja e parë për familjen Dehari nga Kumanova. Vëllai i Astritit, Arbnor Dehari, ish-Sekretar Organizativ i Lëvizjes Vetëvendosje për Prishtinë, kishte ndërruar jetë para rreth dy vitesh.
Aktivisti i Lëvizjes Vetëvendosje, Astrit Dehari, i cili po mbahej prej 68 ditësh në paraburgim, dyshohet se ka kryer vetëvrasje sot në burgun e Prizrenit.
E të njëjten gjë e kishte bërë vëllai i tij, Arbnor Dehari, ish-sekretar Organizativ i Lëvizjes Vetëvendosje, më 11 qershor të vitit 2014. Ai pati kërcyer nga kati i gjashtë i një ndërtese në Prishtinë. Ngjarja kishte ndodhur në lagjen Mati I në Prishtinë.
Arbnor Dehari vdiq në moshën 28-vjeçare, raporton Insajderi.
Astrit Dehari, i cili vdiq sot në Prizren, ishte arrestuar nga Policia e Kosovës më 30 gusht të këtij viti, nën akuzën se ka qenë i përfshirë në sulmin ndaj Kuvendit të Kosovës. Sulmi ndaj Kuvendit të Kosovës kishte ndodhur më 4 gusht.
Ai po mbahej në paraburgim prej 68 ditësh në burgun e Prizrenit.
Një ditë më parë, Lëvizja Vetëvendosje mbajti një aksion simbolik pranë burgut të Prizrenit, aty ku sipas tyre padrejtësisht po mbahej, për 67 ditë Astrit Dehari. Ata kërkuan lirimin e aktivistit të lëvizjes së tyre. /Insajderi.com
