E diela e koalicioneve për balotazh

Në këtë të diel, të paktën deri më tani, ndodhën tri koalicione për garën e balotazhit.

Kryetari i Partisë Demokratike të Kosovës, Kadri Veseli, shtrëngoi duart me kreun e Partisë Demokratike Turke të Kosovës (KDTP), Mahir Yakcilar.

Veseli po kërkon mbështetje nga kjo parti për garën e balotazhin që do të mbahet më 19 nëntor (këtë të diel), për kryetar të Prizrenit, qyteti i dytë më i madh në Republikën e Kosovës.

“Koalicioni i arritur sot mes Partisë Demokratike të Kosovës dhe Partisë Demokratike Turke të Kosovës (KDTP), për bashkëqeverisje edhe në katër vjetët e ardhshëm në Prizren, është një tjetër hap për vulosjen e fitores më 19 nëntor”, ka shkruar Veseli në llogarinë e tij në Facebook.

Në garën e këtij qyteti janë kandidati i PDK-së Shaqir Totaj dhe ai i Vetëvendosjes Mytaher Haskuka.

Në fakt, partia e Mahir Yakcilarin është në koalicion qëndron me PDK-në. Këto parti kanë histori të gjatë të bashkëpunimit. Prej se PDK-ja është në pushtet, Yakcira ka qenë ministër i Ministrisë së Administratës Publike (MAP).

Koalicioni tjetër që ndodhi në këtë të diel ishte ai AKR-së dhe Partisë së Drejtësisë në Mitrovicë.

Kandidati i AKR-së Agim Bahtiri dhe përfaqësuesi i Parisë së Drejtësisë Vesel Neziri nënshkruan marrëveshje për ta mbështetur kandidaturën e Bahtirit për garën e balotazhin në këtë qytet.

“Të gjithë ata që mendojnë për të mirën e Mitrovicës dhe të fëmijëve të tyre, po i bashkohen projektit tim për qeverisjen e ardhshme katër vjeçare, e cila garanton zhvillim ekonomik, zero tolerancë ndaj korrupsionit, mirëqenie më të mirë dhe qeverisje me duar të pastra”, ka thënë Bahtiri.

Bahtiri është në garë me kandidaten e PDK-së Valdete Idrizi.

Përderisa AKR po kërkon ndihmë në Mitrovicë, po kjo parti po i jep mbështetje një partie në një qytet tjetër.

Është koalicioni mes AKR-së dhe LDK-së në qytetin e Ferizajt. Këto dy parti synojnë që ta fitojnë garën përball kandidatit të PDK-së, Agim Aliu.

Gjatë një takimi Sfarça së bashku me kryesuesin e degës së AKR-së në Ferizaj, Labinot Tahiri, nënshkruan marrëveshjen për të cilën kishin rënë dakord për zgjedhjet lokale.

“Jemi dakorduar me liderin e AKR-së në Komunën e Ferizajt që t’u bëjmë ftesë të gjitha subjekteve politike që t’i bashkëngjiten koalicionit tonë LDK-AKR, sepse ka vend për të gjithë”, ka thënë Muharrem Sfarça nga LDK.

Ndërsa Labinot Tahiri nga AKR-ja ka thënë se, cilido që i fiton zgjedhjet lokale, do t’i shërbejë qytetarëve.

“Pavarësisht a fiton Sfarça, apo ndokush, tjetër unë do ta hjeki borën gjithë dimrin, sepse më intereson interesi i gjithë qytetarëve, dhe në këtë takim e falënderoj Lidhjen Demokratike të Kosovës që i ka bërë ftesë për koalicion Aleancës Kosova e Re”, ka ndër tjera Tahiri.

Derisa po i afrohemi zgjedhjeve të cilat do të mbahen më 19 nëntor të këtij viti, janë intensifikuar edhe takimet për arritjen e marrëveshjeve për balotazh./Insajderi.com