Ministri i Punëve të Brendshme dhe Administratës Publike, Agim Veliu, ka thënë se nuk ka marr asnjë njoftim zyrtar nga Albin Kurti për shkarkimin e tij.
Ai në një bisedë ekskluzive për Insajderin ka thënë se nuk janë në komunizëm që të mos guxojnë të thonë mendimin e vetë secili.
Ndërsa, ia ka kujtuar Kurtit se nuk mund të shkarkojë ministra të LDK-së pa pëlqimin paraprak të kryearit, Isa Mustafa.
“Unë nuk e di çka të komentoj sepse nuk jam i informuar në vijë zyrtare, nuk kam kurfarë vendimi, nuk kam kurfarë informate prej kryeministrit dhe nuk e di çka të komentoj këtu”.
“Nuk jemi në komunizëm e totalitarizëm që mos me guxu me fol kurkush. Unë e kam mendimin tim, pa marr parasysh çka thotë ai”, tha ai.
Veliu ka thënë se Kurti nuk mund të shkarkoj ministrat e LDK-së pa miratim të partnerit të koalicionit.
“Po tash kjo është çështje e një niveli tjetër që duhet të diskutohet sepse me marrëveshje ai nuk mund të shkarkoi ministra të LDK-së, pa konsultim dhe pa miratim paraprak të partnerit të koalicionit”, tha ai.
Derisa, mohoi se është i njoftuar Mustafa për shkarkimin e tij.
“Unë nuk di që ka njoftim kryetari Mustafa e as pëlqim, unë nuk jam informuar po të kishte diçka të tillë kryetari Mustafa do të më informonte. Por unë nuk kam kurrfarë informacioni. Nuk e di. Ato janë çështje të organeve të LDK-së”, tha ai. /Insajderi.com
