Ka filluar vaksinimi anti-COVID për personelin shëndetësor në katër qytete të Kosovës, të mërkurën e 7 prillit, njofton Insajderi.
Aktualisht në dispozicion Qendra Kryesore e Mjekësisë Familjare në Obiliq i ka 70 vaksina për stafin mjekësorë, ndërkaq në total janë 105 profesionistë shëndetësorë.
Po ashtu, në komunën e Kamenicës ka filluar vaksinimi, të cilin lajm e bëri të ditur në Facebook kryetari i kësaj komune, Qëndron Kastrati.
Kryetari në vizitën që ia bëri QKMF-së tha se uron që sa më parë të sigurojnë edhe doza tjera të vaksinës anti-COVID, dhe falënderoi stafin shëndetësor për punën dhe ballafaqimin e tyre me pandeminë.
Edhe Komuna e Suharekës, ka nisur vaksinimn kundër COVID-19 për personelin shëndetësor duke qenë e pajisur me 110 dozat e para të vaksinës AstraZeneca.
Vaksinimi ka filluar edhe në QKMF në Kaçanik, ku numri i vaksinave të pranuara është 70 dhe sipas Drejtoreshës së Shëndetësisë dhe Mirëqenies Sociale në Kaçanik, Diana Bajrami-Reka, ka thënë se janë të mjaftueshme.
Sami Uka, këshilltar politik i ministrit të Shëndetësisë, Arben Vitia, në një prononcim ka thënë se deri të martën mbrëma janë vaksinuar tre mijë e 181 persona.
Si pasojë e rritjes të numrit të infektuarve me Coronavirus, nga e mërkura e 7 prillit kanë hyrë në fuqi masat e reja anti-COVID, që përfshijnë mbylljen e gastronomisë ku lejohen vetëm shërbime “merr me vete”./Insajderi.com
