Në Kuvendin e Kosovës ka shpërthyer e qeshura pasi Gashi lavdëroi Osmanin tri ditë pas shkarkimit të Osmanit nga pozitat drejtuese të LDK-së.
Shefi i grupit parlamentar të LDK-së, Arben Gashi, ka lavdëruar kryeparlamentaren, Vjosa Osmanin duke thënë se është e përgjegjshme, kjo shkaktoi të qeshura të shumta në Kuvendin e Kosovës.
Gjatë një diskutimi nënkryetari i Kuvendit nga PDK, Memli Krasniqi, tha se subjekti tij politik nuk voton marrëveshjet ndërkombëtare të iniçuara nga LDK pasi në të kaluarën Lidhja Demokratike e Kosovës kishte injoruar votimin e këtyre marrëveshjeve.
Arben Gashi në replikën e tij, përmendi kohën kur kryetari i kaluar i Kuvendit bënte fotografi në Kuvend për ta provokuar opozitën, ndërsa sipas tij Vjosa Osmani nuk e bën këtë sepse është e përgjegjshme, njofton Insajderi.
“Kryetari i kaluar i Kuvendit bënte selfe, për ta provokuar opozitën – unë do ta kisha kritikuar edhe kolegen tonë, Vjosa Osmanin po ta bëntë këtë, por ajo nuk e bën sepse është e përgjegjshme”, tha Gashi.
Por, kjo lavdatë tre ditë pasi LDK kishte shkarkuar Osmanin nga pozitat drejtuese në parti ngjalli të qeshura në Kuvendin e Kosovës. /Insajderi/
