Anëtari i Lidhjes Demokratike të Kosovës, Arben Gashi, ka thënë se partia ku ai bën pjesë është sinonim i politikbërjes në Kosovë, njofton Insajderi.
“LDK është sinonim i politikbërjes në Kosovë në këto 30 vitet e fundit. kemi kaluar nëpër procese të ndryshme dhe kemi qenë faqebardhë”, është shprehur ai në emisionin Pressing.
Tutje Gashi ka thënë se LDK i ka rezistuar shumë sfidave ndër vite, andaj pret rezultate të mira edhe në këto zgjedhje.
“Deshën që LDK-në ta eliminojmë edhe fizikisht. E dimë. Disa të tjerë kanë qenë edhe kundër pavarësisë. Kaluam edhe sfidën shumë të rrezikshme me administratën Trump. Do të ishte hera e parë që Kosova do të largohej nga tavolina dhe Serbia të qëndronte. Por ne morëm përsipër përgjegjësinë dhe treguam vetën në momentet më të vështira”, shtoi ai.
Gashi po ashtu tha se vetëm LDK e ka mbështetur Marrëveshjen e Rambujes dhe se asnjëherë partia e tij nuk ka qenë kundër proceseve të cilat kanë qenë iniciativë nga partnerët ndërkombëtarë./Insajderi.com
