Drejtori i Institutit të Mjekësisë Ligjore, Arsim Gërxhaliu, ka deklaruar se gjatë ditëve në vijim do të kërkohet për trupat e të pagjeturve në një pjesë në afërsi të Gjilanit dhe atë të Kosovës Lindore, transmeton Insajderi.
Në një intervistë për T7, Gërxhaliu tha se gërmimet në këto vende do të ndodhin para se të ndryshojë moti.
“Do ta hapim një vend në afërsi të Gjilanit dhe në pjesën Lindore të Kosovës, ta shfrytëzojmë kohën para reshjeve atmosferike të dimrit”, tha Gërxhaliu.
Për këtë Gërxhaliu njoftoi pasi ditë më parë u konfirmua gjetja e mbetjeve mortore me origjinë njerëzore në Rashkë të Serbisë.
Sipas informacioneve të para dyshohet se bëhet fjalë për 16-17 trupa të pajetë, por akoma nuk dihet se nga cilat vende të Kosovës është prejardhja e tyre. /Insajderi.com
