21 vjet më parë Sanije Topanica, u bë shpëtimtarja kryesore e grave shtatëzëna në ditët më të vështira të luftës. Ajo ndihmoi lindjen e 180 fëmijëve të luftës, përfshirë edhe lindjen me të vështirë gjatë kolonës në fshatin Koliq të Prishtinës. Vajza e porsalindur në këtë gjendje të vërshtirë ishte pagëzuar me emrin Kolona.
Mamia llapjane Sanije Topanica, jashtë klinikës së saj vetëm gjatë luftës në Kosovë, ka ndihmuar 180 lindje. Derisa para shpërthimit të luftës në klinikën e saj ajo ka ndihmuar gratë të lindin 10 mijë fëmijë.
“Koha më e vështirë ishte viti 1999. Një grua erdhi me lind të unë, pasi ajo ishte nis me shku me lind në Prishtinë, por të hotel “Besiana” ka pas polic e paramilitary serb, që e kanë ndalu. Gruaja kthehet, e vjen të unë e ka pas lindjen e parë, e lindja e parë është zakonisht ma e vështirë. Iu përkeqësu pak gjendja, por i dhashë terapi e infuzione”.
“Ndërkohë paramilitarët kishin ardhë afër spitalit, Gani Podvorica humorist është, kishte ardhë në shpi e i tha burrit tim duhet të largoheni nga shtëpia. Pikrisht Sanien po e kërkojnë policia që e ka krye lindjen. Unë nuk dojsha me u largu, kërkujt keq si kasha ba, edhe e kasha graun në shpi sa kish lind”, rrefen mamia Topanica.
Ajo ishte larguar nga shtëpia njësoj sikur edhe llapjanët e tjerë. Por profesioni i saj, dhe ndjenja për të ndihmuar nuk e lanë të qetë derisa e gjeti ambullanten në fshatin Koliq, e u vendos aty për t`i ndihmuar gratë shtatzëne të lindnin fëmijët e tyre.
“Mua me njihnin, edhe krejt gratë shtatzane afroheshin tek une. Filluan pacientat me ardhe sikur në spital’, vazhdon rrëfimin Topanica.
Lindjen më të vështirë që e ka kryer në luftë thotë se ka qenë gjatë kolonës në Koliq. Vajza që lindi atë ditë të vështirë për të gjithë refugjatët, u pagëzua me emrin Kolona.
Ordinaca e saj në shtëpi u djeg gjatë luftës, por Sanija ka arritur t`i shpëtoj regjistrat e lindjeve që kishte kryer, ndonëse disa nga to edhe janë gjysmë të djegura. /Insajderi.com