Beqir Kallurda është kryetar i trupit gjykues në rastin “Toka” kundër Azem Sylës dhe të tjerëve, i cili i lirua sot nga masa e paraburgimit dhe do të mbrohet në liri.
Jo më shumë se 20 ditë nga koha kur ky rast ka kaluar në duart e vendorëve, gjykatësi Beqir Kalludra, në cilësinë e kryesuesit të trupit gjykues, e liron Azem Sylën nga masa e paraburgimit.
Azem Syla dhe 21 persona të tjerë akuzohen për krim të organizuar në lidhje me tjetërsimin e tokave me pronësi shoqërore në Veternik e Llapnasellë, afër Prishtinës.
Prokuroria Speciale më 25 tetor të vitit 2016 ngriti dy aktakuza kundër 39 personave të ndryshëm, në mesin e të cilëve është edhe ish-deputeti i PDK-së, Azem Syla.
Aktakuza e parë, e parashtruar nga një prokuror ndërkombëtar i Prokurorisë Speciale të Republikës së Kosovës, është ngritur kundër 22 të pandehurve dhe përbëhet prej 46 pikave.
Të pandehurit akuzohen për veprat penale krim i organizuar, pastrim i parave, marrje e mitës, mashtrim i rëndë, mashtrim në detyrë, nxjerrje e vendimeve gjyqësore të kundërligjshme, keqpërdorim i pozitës zyrtare, legalizimi i përmbajtjes së falsifikuar dhe evazion fiskal.
I njëjti gjykatës dënoi katër aktivistët e Vetëvendosjes më 21 vjet burgim.
Gjykatësi Beqir kalludra i cili e liroi Azem Sylën nga masa e paraburgimit, është po i njëjti që kishte dënuar katër aktivistët e Vetëvendosjes, Frashër Krasniqi, Atdhe Arifi, Adea Batusha dhe Egzon Haliti, më 21 vjet burgim.
Ata akuzoheshin për sulm ndaj Kuvendit të Kosovës.
Gjyqtari Kalludra është gjyqtar edhe në rastin e deputetit të Vetëvendosjes, Albin Kurti, në rastin e lotsjellësi në Kuvend./Insajderi.com
