Një grabitje e armatosur ka ndodhur të hënën në fshatin Mleqan të Malishevës, njofton Policia e Kosovës.
Sipas kësaj të fundit, dy persona të armatosur kanë arritur të grabisin në një shtëpi stoli ari dhe para të gatshme në vlerë 7000 euro si dhe kanë demoluar pothuaj të gjitha orenditë në dhoma.
Të dyshuarit më pas janë vërejtur nga familjarët dhe janë larguar më vrap, por më pas në një largësi të konsideruar nga shtëpia, pikërisht në oborrin e shkollës fillore në Malishevë, kanë hasur në disa pengesa dhe aty janë zënë nga familjarët dhe disa fshatarë tjerë që ishin në ndjekje të tyre.
“Dyshohet se dy personat e dyshuar gjatë ikjes kanë shtënë disa here me armë zjarri në drejtim të fshatarëve duke ua rrezikuar jetën. Patrulla policore pothuaj ka arrite në të njëjtën kohë dhe kanë arrestuar dy të dyshuarit: B.H. i lindur 1991 – sh/k. dhe I.R. o lindur 1995 – sh.k. Gjatë kontrollit për siguri personale patrulla policore ka gjetur dhe sekuestruar si prova materiale janë gjet dy armë zjarri: ZORAKI M-906 – B dhe ZASTAVA –TT, CAL.7.62 m Dyshohet se të njëjtat janë përdorë gjatë ikjes, pastaj para të gatshme në apoena 5×200, 2×100, 4×50, një (1) orë dore, pesë (5) unaza gishti, një (1) palë vathë, dy (2) zinxhir më ngjyrë ari, dy (2) pllaka më ngjyrë ari”, thuhet në njoftim.
Gjatë kontrollit të vendit të ngjarjes ku ishin ndaluar të dyshuarit janë gjetur dhe dy (2) kapela, një (1) mbathje sportive, tri (3) doreza pune ,një maskë mbrojtëse anti covid si dhe janë vërejtur njolla gjaku, që dyshohet gjatë ikjes dy personat e dyshuar janë lënduar.
“Të njëjtëve iu është ofruar ndihma mjekësore në QKMF Malishevë, pas marrjes se tretmanit mjekësor të njëjtit janë liruar, dhe janë shoqëruar në Stacionin policor – Malishevë. Pas deklarimeve paraprake në konsultim me prokurorin, dy te dyshuarit ndalohen 48 orë. Hetimet janë në vijimësi, sepse dyshohet se të njëjtit janë të involvuar edhe në ca raste tjera të ngjashme të kryera pikërisht në Malishevë dhe fshatrat përreth”, thuhet në njoftim./Insajderi.com
