Nënkryetari i Partisë Demokratike të Kosovës, Xhavit Haliti ka folur rreth historisë së krijimit të Ushtrisë Çlirimtare të Kosovës, ku mes tjerash ka thënë se propozimi ka qenë i tij që ushtria të quhet Ushtria Çlirimtare e Kosovës dhe më pas ky propozim është miratuar”, njofton Insajdri.
Nënkryetari i PDK-së dhe njëri nga personat kryesor në themelimin e UÇK-së, Xhavit Haliti në emisionin “Debat” të RTK-së ka thënë se ushtria çlirimtare ka pasur parim që mos t ë bëjë krime dhe kjo është zbatuar.
“Nuk ka asnjë rast që UÇK-ja ka bërë ndonjë krim siç ka bërë Serbia. UÇK-ja është demilitarizuar në vitin 1999 dhe ato që kanë ndodhur pas këtij viti nuk mund t’i mveshen UÇK-së. Ndoshta ka pasur individ që kanë bërë krime, por kjo është punë e prokurorisë që t’i zbulojë të gjithë ato vrasje”, ka thënë Haliti.
Ai tutje ka shtuar se politika nuk duhet të ndërhyjë në drejtësi.
Derisa ka folur për arrestimin e krerëve të UÇK-së dhe dërgimin e tyre në Hagë për t’u gjykuar, Haliti ka thënë se kjo për të ka qenë e papritur.
“Nuk kam pritur që ata të arrestohen, por element që kanë kryer krime të drejtpërdrejta, njerëz që nuk kanë marrë urdhra”, ka thënë ai.
Tutje Haliti ka thënë se ka qenë ushtria dhe policia serbe që kanë bërë terror në Kosovë, por që ne nuk kemi vepruar që të krijojmë dosje dhe t’i padisim ata si në mënyrë individuale, po ashtu edhe kolektive.
Ai tutje ka thënë se ka qenë propozimi i tij që UÇK-ja të quhet me këtë emër.
“Propozimi ka qenë i imi që ushtria të quhet Ushtria Çlirimtare e Kosovës dhe më pas ky propozim është miratuar”, ka thënë ai./Insajderi.com
