Kryetari i Aleancës për Ardhmërinë e Kosovës, Ramush Haradinaj, i ka thënë kryeministrit, Albin Kurti, se politizimi dhe njollosja e projektit rreth gazit amerikan është skandaloz, përcjell Shqip.com.
Në një letër që i ka dërguar Kurtit, Haradinaj ka kërkuar që ky i fundit të distancohet nga deklaratat e zëvendëskryeministrit, Besnik Bislimi, i cili tha se Projekti i Gazit është projekt rus.
Letra e Haradinajt drejtuar Kurtit.
“Tani, konsideroj se zhvillimet që kanë pasuar me Qeverinë Kurti, politizimi dhe njollosja e projektit të Gazit, janë skandaloze, shumë të dëmshme dhe rrezikojnë zbatimin e një prej projekteve më të rëndësishme ekonomike dhe gjeopolitike për vendin si dhe partneritetin me SHBA-në.
Nga ju Kryeministër pres distancimin publik dhe thirrje në përgjegjësi të Zëvendëskryeministrit Bislimi, në të kundertën e vlerësoj që qendrimet e Zëvendëskryeministrit dhe të Kryeministrit janë në pajtushmëri të plotë. Prandaj, në keto rrethana kërkesën për një takim konsultativ e konsideroj si të panevojshëm”, thuhet ndër tjerash në letrën e dërguar nga Haradinaj.
Sipas tij, në kohën sa ai ishte kryeministër, është miratuar propozimi për të përfituar nga granti i Korporatës së Mijëvjeçarit dhe për të mbështetur zhvillimin e Programit Kompakt.
Ndryshe, Bislimi ka folur për ardhjen e gazit amerikan në Kosovë, ku sipas tij kjo marrëveshje nuk e sjell asnjë litër gaz nga Shtetet e Bashkuara të Amerikës, por nga Azerbajxhani dhe Rusia.
”Marrëveshja për gazin nuk e sjell asnjë një litër gaz nga Shtetet e Bashkuara të Amerikës. I gjithë gazi është nga Azerbajxhani dhe Rusia, është budallakët të thuhet se gazi që është nga Greqia dhe përmes Maqedonisë së Veriut është nga Amerika”, kishte thënë ai.
Osmani tha se sa i përket aspektit gjeopolitik, Kosova nuk ka rrugëdalje tjetër, përpos që të bashkëpunojë me SHBA-të për këtë çështje, por që për këtë tha se ka studim nga ekspertët dhe ministritë përkatëse.
