Kryeministri i Kosovës, Ramush Haradinaj ka thënë të dielën se nuk i frikësohet Gjykatës Speciale për Krime Lufte, për të cilën ka thënë se është e padrejtë dhe “e papranueshme nga pikëpamja e ligjshmërisë ndërkombëtare”.
Në një intervistë për gazetën spanjolle El Pais, të publikuar dje në uebfaqen e gazetës në internet, Haradinaj ka deklaruar se është gjykuar edhe më parë në në gjykatat ndërkombëtare dhe për këtë nuk i frikësohet Gjykatës Speciale, përcjell Insajderi.
“Nuk kam frikë [nga Gjykata, v.j]. Unë kam kaluar tashmë nëpër gjykatat më të larta ndërkombëtare, ku jam gjykuar dy herë, ri-gjykuar dhe në fund jam liruar. Megjithatë, unë jam kritik ndaj dy karakteristikave të kësaj gjykate: e para, faktin se është jashtë vendit [në Hagë], me gjykatës dhe prokurorë të huaj, sepse duhej të ishte këtu [në Kosovë]; dhe e dyta, që përqendrohet vetëm në viktimat e UÇK-së, në shqiptarët e Kosovës”, ka thënë kryeministri Haradinaj.
Ai ka thënë se kjo gjykatë nuk është e pranueshme në pikëpamjen e ligjeve ndërkombëtare, mirëpo kryeministri u shpreh se tashmë është vonë për ta korrigjuar Ligjin për Gjykatën Speciale.
“[Gjykata Speciale] nuk është e pranueshme nga pikëpamja e ligjshmërisë ndërkombëtare. Ajo duhet t’i hetoj autorët apo viktimat pa dallim etnie, por është tepër vonë për ta korrigjuar këtë”, u shpreh shefi i ekzekutivit kosovar. /Insajderi.com
