Ministrja në detyrë e Punëve të Jashtme dhe Diasporës, Meliza Haradinaj, ka deklaruar se Serbia duhet të marrë përgjegjësi për gjenocidin e kryer ndaj shqiptarëve të Kosovës, njofton Insajderi.
Ajo ka thënë se është koha e fundit që Serbia dhe ekipi i Millosheviqit, “që ende janë nëpër zyra shtetërore, të përballen me krimet e kryera kundër njerëzimit, të cilat ende i mohojnë e mbrojnë”.
“Kosova ishte viktima e Serbia agresori. Dihet botërisht, e nga të gjitha pa përjashtim, çfarë krimesh gjenocidale kreu regjimi i Millosheviqit në Kosovë.
Kasapi i Ballkanit fiks para nëntëmbëdhjetë vjetësh, më 2 Shkurt 2002, zuri vendin që i takonte, vendin e turpit të historisë, duke qenë përballë gjyqtarëve të Gjykatës së OKB-së për Krime Lufte në Hagë për mijëra masakra e krime monstruoze të kryera në Kosovës”, ka shkruar Haradinaj-Stublla në Facebook.
Shefja e diplomacisë kosovare tha se fatkeqësisht ai u dënua vetëm nga ndërgjegjja e njerëzimit të botës demokratike për fashizmin e tij, pasi, sipas saj, “kjo Gjykatë nuk arriti ta çojë në vend drejtësinë, pasi kasapi iu iku nga duart, pa e marrë dënimin e merituar”.
“Edhe sot e njëzetëenjë vjet pas luftës nuk ka drejtësi për mijëra viktima në Kosovë, e cila fatkeqësisht po përballet me drejtësi selektive”, ka shkruar tutje ministrja Haradinaj-Stublla./Insajderi.com
