Pas reshjeve të mëdha të shiut kanë filluar të shfaqen edhe probleme në disa pjesë të vendit, njofton Insajderi.
Kreu i Aleancës për Ardhmërinë e Kosovës, njëherësh kandidat për president, Ramush Haradinaj ka vizituar sot fshatin Volljakë të Klinës, fshat ky që është përfshirë nga vërshime si pasojë e të reshurave.
Haradinaj, përmes një postimi në “Facebook” ka apeluar te institucionet qendrore që të mobilizohen dhe të intervenojnë në sanimin e hapësirave të cilat janë përmbytur.
“Sot së bashku me kryetarin e Klinës Zenun Elezi, vizituam fshatin Volljakë që është përfshirë nga vërshime të mëdha si pasojë e të reshurave të fundit. Gjendja është alarmante dhe bëj apel te institucionet qendrore për një mobilizim të menjëhershëm me qëllim të intervenimit, përballjes dhe sanimit të kësaj hapësire nga pasojat e përmbytjeve”, ka shkruar Haradinaj në “Facebook”./Insajderi.com
