Ish-ministri i Kulturës, Astrit Haraqia po tenton që të bëhet drejtor i Administratës Tatimore (ATK), përderisa shefi i tij në biznes, Ukë Rugova nuk i kishte paguar tatime shtetit të Kosovës.
Bëhej fjalë për biznesin me viza, të cilin e kishte udhëhequr djali i ish-presidentit Ibrahim Rugova, Uka.
Insajderi kishte publikuar një seri shkrimesh për biznesin kriminal me viza, pjesë e së cilit ishte edhe Astrit Haraqija.
Teksa ky i fundit po synon që ta udhëheq institucionin e mbledhjes së tatimeve, sa kishte qenë pjesë e biznesit me viza, ata u kishin ikur tatimeve.
ATK-ja kishte njoftuar prokurorinë se ky biznes nuk paguante tatimin ndaj shtetit. Kur hetuesit e kishin pyetur Ukë Rugovën për borxhet ndaj shtetit, kishte pohuar se Suel Bajrami, ortaku i tij, merrej me kryerjen e obligimeve ndaj shtetit.
Teksa ka folur për synimin e tij për tu bërë i pari i ATK-së, Haraqia ka thënë se i plotëson të gjitha kushtet për këtë pozitë.
“Qe shtatë vite pa punu, edhe duhet me punu. Kushtet të gjitha i plotësoj. Dy vjet kryeshef,tri e gjysëm ministër, një vit zv/ministër i financave bash me ATK jam marrë, i dënuar s’jam”, tha Haraqija për Insajderin.
Astrit Haraqija ka qenë ministër i Kulturës në periudhën 2014-2017.
Më datën 15 dhjetor të vitit 2016 Gjykata Themelore e Prishtinës i kishte shqiptuar dënim me kusht Astrit Haraqisë, për keqpërdorim të detyrës zyrtare.
Por në muajin qershor të vitit 2017, Gjykata e Apelit kishte marrë aktgjykimin lirues ndaj Haraqisë dhe Valton Beqirit, dy ish-ministrave të Kulturës.
Megjithatë ai gjendet ende në një proces gjyqësorë. Asnjë seancë nuk është mbajtur që nga transferimi i lëndës nga Eulexi tek gjykata vendore.
Në vitin 2015, Gjykata Themelore e Prishtinës e kishte shpallur fajtorë Astrit Haraqinë me 10 muaj burg me kusht. Në këtë çështje kishte qenë i përfshirë edhe producenti Armond Morina.
Producenti filmik Armond Morina u dënua me gjashtë muaj burg efektiv, ndërsa producenti tjetër Nehat Fejza ishte shpallur i pafajshëm. Ish-ministri akuzohej për shpërdorim detyre.
Haraqia që drejtoi Ministrinë e Kulturës në vitet 2004-2007, më 27 shkurt 2006 kishte nënshkruar kontratë me Nehat Fejzën, pronar i kompanisë “Concordia Pictures”, në vlerë prej 220,000 eurosh.
Ministri më 30 janar 2007, nënshkroi një kontratë tjetër me Armond Morinën, pronar i kompanisë “Morina Films”, në vlerë prej 350,000 eurosh.
Valton Beqiri që drejtoi Ministrinë e Kulturës nga 2008-ta deri në 2010-ën, kishte nënshkruar aneks kontratën me “Morina Films”, duke transferuar 100 000 euro si subvencione për realizimin e filmit “Mysafir në Sofër”.
Sipas aktakuzës së prokurorisë, ministria nënshkroi kontrata për këta filma në vlerën e 570,000 eurove në kundërshtim me Ligjin për Prokurim Publik dhe atë për Kinematografinë.
Aktakuza kundër dy ish-ministrave dhe dy producentëve u ngrit në prill të vitit 2012, ndërsa gjykimi i tyre nisi në marsin e 2014-s. Por, më 2016, Gjykata e Apelit e kishte liruar nga akuzat Haraqinë, kështu duke e shpallë të pafajshëm.
Përfshirja e sekserit në mashtrimin me viza
Viti 2016, për Astrit Haraqinë kishte qenë një tjetër përballje me drejtësinë. Prokuroria Speciale e Kosovës kishte ngritur aktakuzë ndaj Haraqisë dhe ndaj Ukë Rugovës, djalit të ish presidentit të ndjerë Ibrahim Rugovës.
Uka akuzohet për krim të organizuar dhe trafikim njerëzish, ndërsa Astrit Haraqia si ish-ministër, e kishte për detyrë t’ia gjente klientët për vizat italiane Schengen.
Insajderi në vazhdimësi kishte raportuar për “Dosjen Grande” hulumtimi ky që zbardhte përfshirjen e Ukë Rugovës në mashtrimin me viza shengen.
Dyshohet se Ukë Rugova i kishte besuar që të vepronte vetëm si një sekser i tij në biznesin e shitjes së vizave. Haraqia akuzohet se kishte siguruar për Ukë Rugovën klientë që kërkonin viza italiane.
“Roli i Astrit Haraqisë ishe për të siguruar klientët për grupin. Dëshmitarë të shumtë kanë dhënë prova se ai ishte duke rregulluar viza italiane Shengen për ta”, thuhej në aktakuzën për të cilën kishte raportuar Insajderi.
Po ashtu Haraqija si i akuzuar përmbante problem edhe për hetuesit e EULEX-it. Kishte kontakte të shpeshta me dëshmitarët e ftuar për intervistim, të cilët ishin pajisur me viza. Brenda më pak se një muaji kishte biseduar 14 herë me një prej dëshmitarëve të ftuar për intervistim nga hetuesit e EULEX-it.
I kontaktuari nga Haraqija nuk ishte shfaqur në zyrat e EULEX-it, në ditën kur ishte paraparë të dëgjohej dëshmia e tij.
Dyshimet e EULEX-it për ndikimin e Astrit Haraqisë në dëshmitarë
Hetimi ndërkombëtar prej 26 muajsh kishte zbuluar se djali i presidentit Ibrahim Rugova, Uka, dyshohet se është i përfshirë në veprat më të rënda kriminale. Ai, pos biznesit të paligjshëm me viza, dyshohet se ka lidhje me trafikim ndërkombëtar të drogës dhe armëve.
Puna e ndërkombëtarëve me rastin e Harqisë ishte ndërprerë në fillim të këtij viti. Në janar rasti nga Eulexi kishte kaluar tek vendorët. Që nga atëherë deri më tani është zhvilluar asnjë seancë gjyqësore.
Megjithatë tashmë Harqija ka një betejë tjetër – ngjitjen në pushtet të ATK-së. Ai ka konfirmuar se ka aplikuar për të parin e këtij institucioni.
Ai ka thënë se ka shtatë vite pa punuar. Ka insistuar se i plotëson të gjitha kriteret si dhe ka thënë se nuk është asnjëherë i dënuar.
“Qe shtatë vite pa punu, edhe duhet me punu. Kushtet të gjitha i plotësoj. Dy vjet kryeshef,tri e gjysmë ministër, një vit zv/ministër i financave bash me ATK jam marrë, i dënuar s’jam”, tha Haraqija për Insajderin.
Harqija ishte përfshirë edhe në zgjedhjet e fundit ku për krijimin e Qeverisë Haradinaj kishte qenë mjaftë e aktivë në sigurimin e votave. Po ashtu kishte qenë në takimin e Haradinajt me deputeten e LDK-së Teuta Rugova, motrën e Ukës./Insajderi.com
Fuqia e sekserëve – pas Dardan Gashit edhe Haraqija synon ngjitjen në pushtet
