Nënkryetari i Lidhjes Demokratike të Kosovës, Lutfi Haziri, ka konfirmuar se janë duke u zhvilluar negociatat për zgjedhjen e presidentit të ri. Haziri thotë se opozita nuk i ka votat për ta rrëzuar Qeverinë Hoti, njofton Insajderi.
Haziri ka deklaruar se nëse nuk arrihet të zgjidhet Presidenti i ri, vendi do të shkojë në zgjedhje.
“E para, duhet me nënvizuar që Qeveria e pakicës edhe më tutje mbahet në kuadër së marrëveshjes së partnerëve: LDK, AAK, NISMA dhe minoritetet. Përderisa vendi i presidentit dhe mosarritja e një marrëveshje për president, lë hapësirë për vazhdimin e negociatave lidhur me mundësinë e zgjedhjes së presidentit nga ana e partnerëve të koalicionit në koordinim edhe me opozitën. Nëse kjo nuk ndodhë atëherë duhet me gjetur një alternativë tjetër e cila i jep mundësi ose të zgjidhet Presidenti ose të ketë zgjedhje të reja parlamentare”, ka thënë Haziri.
“Deri atëherë edhe më tutje po vazhdojmë me bisedime lidhur me gjetjen e mundësisë së zgjedhjes së presidentit. Qeveria në anën tjetër është e pacenueshme dhe pa atakuar në funksionim të saj si ekzekutiv”, shtëoi më tej ai.
Deklarimet nga zyrtarët e opozitës, se shumë shpejtë do ta rrëzojnë Qeverinë Hoti, Haziri nuk i merr seriozisht.
Thotë se nuk do të mund ta arrijnë një gjë të tillë, për shkak që nuk i posedojnë votat e mjaftueshme.
“Nuk i kanë votat. Nuk pres që mocioni të arrijë legalisht legjitimitetin për tu inicuar, për tu inicuar edhe mund por për të rrëzuar nuk di a munden me arritur një shumicë të mjaftueshme për me rrëzuar Qeverinë Hoti”, thotë Haziri./Insajderi.com
