Kryeministri i Kosovës, Avdullah Hoti, i shoqëruar nga ministri i infrastrukturës, Arban Abrashi, kanë inspektuar në autostradën “Ibrahim Rugova”, bartjen e turbinave për energji të ripërtërishme, të cilat do të vendosen nesër në Shalë të Bajgorës, njofton Insajderi.
Kjo bartje konsiderohet mjaft strategjike, meqë do të shërbejë për furnizimin stabil me energji elektrike.
Kreu i Qeverisë tha se ky investitor e ka statusin e investitorit strategjik në Kosovë.
“Ky investitor e ka statusin e investitorit strategjik në Kosovë, është ndër investitorët më të mëdhenj në një sektor strategjik për Kosovën për prodhimin 105 megavat energji elektrike. Me një investim që shkon 187 milionë euro, 50 e ca milionë euro prej BERZH-it. Ne rastësisht sot u ndalëm me pa këtë gjë specifike të bartjes së materialeve dhe turbinave. Besoj se shpejtë do të jemi në Shalë të Bajgorës për të parë se si investohet dhe kontribuojnë në furnizimin stabil me energji elektrike”, tha ai.
Ndërsa ministri Abrashi u shpreh se ky investim është në fazën e parë të implementimit.
“Sot u ndalëm të shohim këtë investim të madh që kalon shumën e 150 milionë euro. Tani është pak a shumë faza e parë e inplementimit sjellja e turbinave. Projekt i cili vazhdon deri në fluturaket gjatë vitit të ardhshëm”, tha ai. /Insajderi.com
