Kryeministri i Republikës së Kosovës, Avdullah Hoti, ka deklaruar sot në Parlamentin Evropian se heqja e vizave për qytetarët e Kosovës është çështja më e rëndësishme sa i përket përspektivës evropiane në vend, njofton Insajderi.
Derisa kishte marrë fjalën para deputetëve evropianë, Hoti shfaqi bindjen se Kosova do të marrë statusin edhe të vendit kandidat për anëtarësim në Bashkimin Evropian.
“Kosova ka popullsinë më të re në Evropë dhe për ne është shumë e rëndësishme të hapen kufijtë. Po punojmë së bashku me opozitën për këto procese, sidomos për dialogun. Unë pas çdo raundi të dialogut do t’i raportojë Kuvendit. Kur të arrihet marrëveshja, na duhet shumica dërmuese në Kuvend dhe ne jemi duke punuar në parime shumë të qarta për të arritur këtë marrëveshje”, tha Hoti.
Ai ka folur edhe për Dhomat e Specializuara, për të cilat tha se do të respektohen, teksa shtoi se Qeveria e Kosovës angazhohet për sundimin e ligjit dhe se nuk do të bëjë asnjë kompromis në këtë drejtim.
“Kosova është e interesuar për integrime në BE, pasi ndan vlera të njëjta”, u shpreh ndër tjera kreu I Qeverisë së Kosovës.
Kryeministri Hoti po qëndron sot për vizitë zyrtare në Bruksel, gjatë së cilës është takuar me presidentin e Parlamentit Evropian, David Sassoli, Grupin e Miqësisë së Kosovës në PE, eurodeputetë, si dhe Komisionin për Punë të Jashtme në PE. /Insajderi.com
