Në një bashkëbisedim përmes ekranesh, Avdullah Hoti, u ka thënë ambasadorëve të BE-së se fundi i dialogut duhet të prodhojnë njohjen.
Kryeministri i Kosovës, Avdullah Hoti, ka njoftuar, përmes një takimi virtual, ambasadorët e Bashkimit Evropian për procesin e dialogut ndërmjet Kosovës dhe Serbisë, njofton Insajderi.
Siç thuhet në njoftimin zyrtar nga Kryeministria, Hoti është shprehur para ambasadorëve se “Qeveria pret që ky proces të përmbyllet me marrëveshjen gjithëpërfshirëse dhe ligjërisht obliguese, që përfundon me njohjen reciproke ndërmjet dy vendeve”.
Gjithashtu njoftohet se gjatë kësaj bisede, Hoti ka theksuar faktin se “liberalizimi i vizave do të hapte një mundësi reale për qytetarët dhe bizneset e Kosovës dhe do të krijonte mundësi të reja të zhvillimit ekonomik të vendit”.
Përveç për dialogun e për vizat, Hoti ka diskutuar me ambasadorët edhe për situatën me COVID-19.
Ka falënderuar ambasadorët për ndihmën e dhënë Kosovës në përballimin e situatës me pandeminë. Ka shprehur po ashtu përkushtimin e Qeverisë për parandalimin dhe menaxhimin sa më efikas të kësaj pandemie./Insajderi.com
