Kryeministri në detyrë i Kosovës, Avdullah Hoti, ka bërë të ditur se Qeveria do të ndajë paga shtesë për mësimdhënësit, transmeton Insajderi.
Lajmin se do të ndajë paga shtesë për punëtorët e arsimit, Hoti e bëri të ditur në takimin e sotëm me përfaqësuesit e Sindikatës së Bashkuar të Arsimit, Shkencës dhe Kulturës.
“Kryeministri Hoti, fillimisht e ka përgëzuar kryetarin e SBASHK-ut Rrahman Jasharaj, për punën e palodhshme dhe sfiduese të arsimtarëve në kushte të pandemisë, si dhe e ka siguruar që pagesa shtesë për punëtorët e arsimit do të kryhet në dy këste. Këstin e parë do ta marrin me pagën e muajit shkurt, ndërsa këstin e dytë me pagën e muajit maj”, thuhet në nj njoftim të zyrës për informim të Qeverisë.
Po ashtu, është bërë e ditur se është folur edhe për Kontratën e Re Kolektive.
“Për shumën e pagës shtesë, Ministria e Arsimit, SBASHK-u dhe Ministria e Financave do të dakordohen në përputhje me mundësitë buxhetore. Në takim me përfaqësuesit e SBASHK-ut, Kryeministri në detyrë Hoti, ka biseduar edhe për Kontratën e re Kolektive, e cila pritet të finalizohet këtë të premte”, thuhet në njoftim. /Insajderi.com
