Kryeministri i Republikës së Kosovës, Avdullah Hoti, bashkë me Ministrin e Ekonomisë dhe Ambientit, Blerim Kuçi, ka takuar Bordin dhe Menaxhmentin e Trepçës, pas bllokimit të llogarive për shkak të borxheve ndaj kreditorëve, njofton Insajderi.
Pavarësisht performancës së mirë dhe rritjes së prodhimit për 28% gjatë këtij viti, rënia e çmimeve në bursa dhe tregje ndërkombëtare e ka nxjerrë këtë kompani me afarizëm negativ.
Në një komunikatë për media nga zyra e kryeministrit thuhet se Trepça ka trashëguar kontrata të pafavorshme të cilat po i shkaktojnë dëme financiare.
Prandaj, Ministria e Ekonomisë dhe Ambientit do të bashkëpunojë me Bordin dhe Menaxhmentin e Trepçës, në përgatitjen e planit të biznesit për tejkalim të situatës.
Ndryshe, punëtorët e këtyre ndërmarrjeve kanë paralajmëruar edhe protesta në rast se nuk gjendet zgjidhje për këtë çështje.
Kryeministri Hoti, bashkë me Ministrin Kuçi, sot ka takuar edhe Sindikatën e Telekomit të Kosovës, të cilës po ashtu u janë bllokuar llogaritë, edhe pse në tre muajt e fundit Telekomi i Kosovës ka performuar pozitivisht. /Insajderi.com
