Deputeti i Partisë Demokratike të Kosovës, Enver Hoxhaj, i është përgjigjur deklaratave të ish-kryeministrit të Kosovës, Isa Mustafa, i cili e quajti gënjeshtar për fjalën e tij në Kuvend ku tha se Asociacioni është nënshkruar nga ai, njofton Insajderi.
Hoxhaj me anë të një postimi në Facebook, tha se ishte Mustafa që e miratoi aktin juridik të marrëveshjes për Asociacionin.
“Z. Mustafa, meqë pretendoni se jeni akademik, dhe merrni vesh nga dokumentet zyrtare, po përpiqem të ju sqaroj ne atë nivel, se bazuar në Ligjin për Marrëveshjet Ndërkombëtare, ju keni pasur të drejtën e kryerjes së të gjitha vendimeve që lidhen me marrëveshjet ndërkombëtare të Republikës së Kosovës, në pajtim me Kushtetutën dhe Konventën e Vjenës për të Drejtën e Traktateve. Prandaj, marrëveshja për jetësimin praktik të Asociacionit të komunave me shumicë serbe, është bërë me nënshkrimin tuaj në vitin 2015 – dhe me atë nënshkrim ka marrë fuqi akti juridik. Ju e dini, se mbi këtë bazë është trajtuar marrëveshja edhe nga Gjykata Kushtetuese”.
“Me të drejtë, edhe ekspertët kushtetues e kanë konstatuar se Marrëveshja e Parimeve të Përgjithshme është trajtuar si ‘akt juridik i miratuar nga Kryeministri i Republikës së Kosovës’. Pra Referimi i Parimeve në procesin e vlerësimit të kushtetutshmërisë në gjykatë është trajtuar si ‘akt ligjor i miratuar nga Kryeministri i atëhershëm Isa Mustafa’”, ka shkruar Hoxhaj.
Deputeti i PDK-së tha se postimi i Mustafës ishte përpjekje e tij për të larguar ai dhe Qeveria Hoti çdo përgjegjësi nga Asociacioni, ndërsa e akuzoi se po mbrohet nga ” kompromiset ku e kanë futur vendin”.
“Me vjen keq, por z. Mustafa, faktet janë kokëforta. Frika ime dhe e qytetarëve të Kosovës këto ditë po rritet pikërisht nga përpjekja e juaj dhe e qeverisë Hoti për ta larguar çdo përgjegjësi nga Asociacioni. Si funksionar politik, nuk duhet t’i ikni përgjegjësisë nëse vërtetë mendoni se e keni bërë më të mirën për Kosovën. Situata të ngjashme, besoj ju kujtohet, kemi pasur edhe së bashku në qeveri, e veçmas për demarkacionin. Reagimi i juaj më duket sot më shumë për ta mbrojtur këtë qeveri dhe kryeministrin Hoti nga kompromiset ku e kanë futur vendin, se sa vendimin tuaj me 2015. Edhe pse çdo herë ju kam respektuar dhe vlerësuar, z. Mustafa, unë nuk e kam në plan të bëj kompromise me të vërtetën, vetëm se kjo nuk të pëlqen ty”.
Hoxhaj gjithashtu tha se Isa Mustafa i Facebookut është tjetër nga Isa Mustafa i politikës që njihet.
“Ky i rrjeteve sociale duket se nuk është i vërteti”. /Insajderi.com
