Infektologu Kosovar, Izet Sadiku, ka folur për ri-infektimin me COVID-19 dhe pasojat që bartë ai, transmeton Insajderi.
Ai thotë se edhe personat që e kanë kaluar Coronavirusin në këta gjashtë muaj duhet t’i përmbahen rregullave dhe të mos ndjehen komod.
“Ka pasur raste që janë deklaruar për herë të dytë që kanë dalë me COVID, nuk kanë pas simptoma herën e parë”, ka thënë Sadiku në “Sytë 7” të Klan Kosovës.
“COVID-19, kemi disa mutacione të këtij virusi, sa më shumë që qëndron virusi të njerëzit, bëhen mutacione më të mëdha. Tipi anglez, tipi afrikan dhe tash një tip brazilian por ende nuk ka hulumtim të mirëfillt për të parë efeket e tij. Deri tash ka hulumtime në Britani që deri në gjashtë muaj njerëzit kanë antitrupa. Ende preferohet të mbahet maska edhe për ata që e kanë kaluar, të mos ndjehen komod”, është shprehur ai.
Më tej infektologu Sadiku tha se qytetarët duhet të kenë parasysh e të kujdesen në këtë fazë, meqë së shpejti pritet të vijnë edhe vaksinat.
“Imuniteti është specifik. Sa i përket virusit është shumë i ri, zhvillimet dhe të arriturat e këtij virusi janë shumë të mëdha. Kemi pasur raste të cilat janë deklaruar në forma të lehta, nuk kanë pas antitrupa, domethënë ata s’kanë krijuar antitrupa. Por ata që s’kanë krijuar antitrupa, konsiderohet që kanë imunitet qelizor. Qytetarët duhet të kenë parasysh të kujdesen këtë fazë sepse së shpejti vijnë edhe vaksinat. Personat që kanë kaluar sëmundjen, me përdor masa mbrojtëse”, tha ai. /Insajderi.com
