Infermieri Enlirat Duraku që pesë ditë ka hyrë në grevë urie për shkak të mosrritjes së pagesës për ndërrimet e natës për infermierët, për mospagesën e punës gjatë vikendit dhe orëve shtesë, njofton Insajderi.
Me anë të një postimi në Facebook, Duraku ka njoftuar se në ditën e pestë të grevës, atij i është përkeqësuar gjendja shëndetësore, andaj edhe deri në orën 05:00 të mëngjesit, ka qenë i shtrirë në Klinikën Emergjente.
Ai i është drejtuar presidentes Vjosa Osmani, kryeministrit Albin Kurti, ministrit të Shëndetësisë, Arben Vitia e kryetares së Komisionit Parlamentar të Shëndetësisë, Fatmire Kollçaku duke thënë se derisa Qeveria dhe Kuvendi kanë buxhet që të ndajnë 200 mijë euro për kafe, duhet të ketë buxhet edhe për rritje të pagesës për ndërrimet e natës për infermierët, për punën gjatë vikendeve dhe orët shtesë.
“Më zuri në Qendrën Emergjente deri në ora 05:00 të mëngjesit, gjë që tregon se greva e urisë ka filluar të ketë ndikim negativ në shëndetin tim më shpejtë se sa që e kam parashikuar, me dhimbje të papërshkruara, frekuencë të lartë të të rrahurave të zemrës, marramendje, i dezorientuat etj.”, ka shkruar ai.
“Presidente Vjosa Osmani, Kryeministër Albin Kurti, Ministër i Shëndetësisë Arben Vitia, Kryetare e KMP për Shëndetësi Fatmire Mulhaxha Kollçaku… Deri sa Qeveria e Reoublikës së Kosovës dhe Kuvendi i Republikës së Kosovës ka buxhet që të ndajë fonde prej 200.000 € për kafe ndërsa ka buxhet poashtu që t’ua paguaj energjinë elektrike minoriteteve, sigurisht që duhet të ketë buxhet edhe për rritje të pagesës së ndërrimeve të natë për infermier, pagesë të punës gjatë vikendeve dhe orët shtesë si dhe pagesën e rrezikshmërisë në punë”.
“Llogariteni se sa mund të qëndrojë njeriu pa bukë, ju jeni intelektual dhe të menqur, ndërsa grevën nuk e ndal deri në realizim të kërkesave të infermierëve. Nëse më ndodhë ajo më e keqja, për shkak të pasivitetit që po tregohet karshi kërkesave të infermierëve, si dhe për shkak që keni zgjedhur injorimin si platformë komunikimi me infermierët, publikisht do ju mbajë përgjegjës ju”, ka shkruar ai. /Insajderi.com
