Ish-deputeti i Lidhjes Demokratike të Kosovës, Xhavit Ukaj, është deklaruar rreth mundësisë së mosmarrjes pjesë të tre deputetëve të LDK-së në seancën ku do të votohet kandidatja për presidente, Vjosa Osmani.
Ukaj ka thënë se kjo parti nuk e ka për obligim që ta votojë Vjosa Osmanin për presidente. Sipas tij arsyeja pse ajo nuk duhet që të votohet për presidente është se s’ka garuar në listën e LDK-së, por në atë të Lëvizjes Vetëvendosje.
“Për të qenë prezent në seancës që do të mbahet për zgjedhjet e presidentit, mirëpo dihet mirë se barrën kryesore do ta mbajnë të gjithë deputetët. LDK-ja nuk ka asnjë obligim për ta bërë znj. Osmanin presidente. E para ajo nuk ka garuar në listën e LDK-së por në një listë tjetër atë të VV-së dhe nuk e di se çfarë obligimi ka LDK-ja që ta votojnë Vjosa Osmanin për presidente”, ka thënë ai në emisionin “Frontal”, në T7.
“Znj.Osmani disa herë ka bërë gabime dhe për atë nuk e meriton me qenë presidente. Ajo nuk është person unifikues dhe me asnjë subjekt politik nuk i ka punët mirë. Nuk e di se cilat deputetë të LDK-së kanë me e bë Vjosa Osmanin presidente”, tha ai në T7.
Ukaj ka folur për deputetët e mundshëm të LDK-së që nuk do ta votojnë Vjosa Osmanin për president, në listën e të cilit hyn edhe ish-kryeministri Avdullah Hoti.
“Të ju them të drejtën, të gjithë këta deputet që i kam pasur kolegë. Në momentin e zgjedhjes së presidentit dyshojë se aty do të jenë 3-4 deputetë që nuk do të marrin pjesë në votim. Duke i njohur nga afër duke u nisur nga Z.Agim Veliu, z.Driton Selmanaj dhe z.Avdullah Hoti, duke i njohur të tre vlerësoj që nuk do të votojnë për znj.Osmani. Edhe një mund të shtohet por deri në këtë moment e di që këta të tre nuk do të marrin në votimin e presidentit”, deklaroi ai. /Insajderi.com
