Ish-presidentja Atifete Jahjaga ka uruar Vjosa Osmanin për zgjedhjen në pozitën e presidentes së vendit, njofton Insajderi.
Nëpërmjet llogarisë së saj në Facebook, Jahjaga uron që Osmani “të jetë simbol i unitetit dhe garantuese e funksionimit kushtetues, ligjor dhe demokratik të institucioneve të Republikës së Kosovës”
“Uroj Presidenten e Republikës së Kosovës, zonjën Vjosa Osmani-Sadriu për zgjedhjen e saj si kryetare e Republikës. Kosova ka në krye të shtetit sërish një presidente grua- dëshmia më e mirë për rrugën e trasuar nga gjenerata të tëra grash që në role të ndryshme e kanë mundësuar që kjo arritje tashme të shndërrohet në normë.
Si Presidentja e parë e Kosovës, uroj që Presidentja Osmani të jetë simbol i unitetit dhe garantuese e funksionimit kushtetues, ligjor dhe demokratik të institucioneve të Republikës së Kosovës. Uroj që udhëheqja e saj të karakterizohet nga maturia duke e mbajtur në mendje dhe në zemër interesin e çdo qytetari të Kosovës dhe të drejtën e tij/saj për jetë të dinjitetshme”.
Tutje Jahjaga ka thënë se “Republika e Kosovës është institucion i ndërtuar mbi sakrificen e gjeneratave për ta bërë Kosovën vend të mundësive të barabarta, në partneritet dhe miqësi të fuqishme me Shtetet e Bashkuara të Amerikës dhe të integruar në Bashkimin Evropian dhe NATO, si dy aleanca me të cilat shoqëria jonë ndan vlerat dhe idealet për liri dhe demokraci”.
Në fund Jahjaga e ka përgëzuar klasën politike që ka gjetur gjuhën dhe mirëkuptimin për ta votuar Osmanin për presidente.
“Njëkohësisht, përgëzoj klasën politike të Kosovës për maturinë e treguar në tejkalimin e ngërrçeve politike dhe konstruktivitetin e dëshmuar në konsolidimin e institucioneve. Tani është koha që të gjitha institucionet që dolën nga zgjedhjet e 14 Shkurtit t’i përvishen punës. Kosova nuk ka më kohë për të humbur! Urime dhe ju priftë e mbara”./Insajderi.com
