KEDS-i ka paralajmëruar se çmimet e enegjisë elektrike në Kosovë do të pësojnë rritje të papërballueshme për qytetarët.
Kjo pasi sipas tyre, rënia e temperaturave pritet të rrisë konsumin, dhe si rrjedhojë edhe nevojën për import shtesë, pasi prodhimi vendor është i kufizuar.
KEDS-i po ashtu njofton se kjo rritje e kostos do të jetë e papërballueshme edhe për të dhe KESCO-n.
Më tej, bëhet e ditur se rritja e çmimeve të energjisë elektrike ka shkaktuar edhe rritje të madhe të vlerës së importit të energjisë.
“KEDS dhe KESCO gjatë tetorit të këtij viti, pra, për një muaj, përkundër motit të mirë, ka importuar 9,15 milionë euro energji elektrike, një rritje enorme nga 1,5 milionë euro sa ishte në periudhën e njëjtë të vitit të kaluar”, thuhet në komunikatën për media.
KEDS
“Kjo rritje ka rrjedhur nga çmimet ekstreme dhe për shkak të rritjes së kërkesës. KEDS dhe KESCO ka blerë gjatë tetorit energji elektrike me çmim mesatar prej 242 euro për megavat/orë, një rritje prej gati pesëfish nga tetori i vitit 2020, kur energjia elektrike ishte importuar me çmim mesatar prej 49 eurosh për megavat/orë”.
Pra, konsumi është rritur për 18 për qind në krahasim me periudhën e njëjtë të vitit të kaluar, thotë KEDS-i.
“Për shkak të rritjes së konsumit KEDS dhe KESCO është detyruar që të importojë gjatë muajit tetor 37,753 megavat orë energji elektrike. Trendi i rritjes së konsumit ka vazhduar edhe gjatë nëntorit, sikurse edhe blerja me çmime të larta, madje mbi ato të muajit tetor”.
“Kështu, llogaritet të ketë kosto astronomike dhe të papërballueshme jo vetëm për KEDS dhe KESCO por për të gjithë qytetarët e Kosovës.
Prandaj, kursimi maksimal dhe përdorimi i formave alternative për ngrohje, është i domosdoshëm në të gjithë vendin”./Insajderi.com
