Qeveria e Serbisë po vazhdon ta prolongojë aprovimin e kërkesave të shqiptarëve në Luginë të Preshevës, duke u arsyetuar në mungesë të stabilitetit politik në dy komunat me shumicë shqiptare
Për këtë kryetari i Bujanovcit, Shaip Kamberi për RTK thotë se uniteti politik është i domosdoshëm.
Sipas të parit të Komunës në Bujanoc, uniteti është më se i domosdoshëm në mënyrë që të realizohen kërkesat primare të hartuara në planin shtatë-pikësh të cilin e ka pranuar edhe qeveria e Serbisë. Kjo e fundit, sipas Kamberit, po vazhdon të prolongoj aprovimin e kërkesave të shqiptarëve duke u arsyetuar në mungesë të stabilitetit politik në dy komunat me shumicë shqiptare.
Kamberi ka përkujtuar asamblistët e Kuvendit të Preshevës për përgjegjësinë që kanë karshi qytetarëve të cilët ua kanë dhënë besimin për t`i përfaqësuar.
Kuvendi i Preshevës rrezikon të shpërbëhet nëse deri më 24 gusht nuk do të konfirmoj stabilitetin e vet duke mbajtur seancën e radhës e cila ka dështuar në mungesë të kourumit.RTK
