Sokol Havolli, këshilltari i kryeministrit të Kosovës Isa Mustafa, ka ironizuar me Lëvizjen Vetëvendosje pas raportimeve se kryetari i Komunës së Prishtinës, Shpend Ahmeti është parë në një jaht në Mal të Zi.
“Ju paskeni edhe jahta?”, pyet Havolli, teksa ironizon me anëtarin e Kryesisë së Lëvizjes Vetëvendosje dhe njëkohësisht kryetarin e Prishtinës.
“Albin Kurti nifar vakti thojke: ‘Ata kane xhipa, ne duam trotuare.’ Albin, ju paskeni edhe jahta?”, shkroi Havolli në Facebook.
Gazeta Metro ka siguruar një foto në të cilën shihet kryetari i Prishtinës Shpend Ahmeti në një jaht, që siç raporton Gazeta Metro ndodhet në Mal të Zi.
Sipas raportimeve të këtij mediumi, Ahmeti të premtën pasi kishte ndjekur ndeshjen Kosovë-Islandë, kishte udhëtuar për në Budva të Malit të Zi.
I kontaktuar nga Gazeta Insajderi, zyrtari për medie i Lëvizjes Vetëvendosje Shkodran Hoti ka thënë se nuk posedon informacion për këtë rast.
