Instituti kosovar për kërkime dhe zhvillime të politikave kosovare ‘KIPRED’ ka publikuar raportin për fushatën dezinformuese të mediave ruse dhe serbe kundër Kosovës për vitin 2020, të cilët u munduan ta paraqesin Kosovën shtet të dështuar, njofton Insajderi.
Siç bëhet e ditur në njoftim, nga monitorimi i të dhënave nga mediat e përzgjedhura serbe, nga 1 janari deri më 31 dhjetor të vitit të kaluar tregojnë se janë publikuar katër mijë e 800 lajme në mënyrë të drejtpërdrejtë që kishin të bëjnë me Kosovën, lajme këto që kishin dezinformata dhe synonin krijimin dhe forcimin e narrativave për lëkundjen e themelit të shtetësisë së Kosovës.
“Duke e paraqitur Kosovën si një shtet të dështuar dhe problematik që është shndërruar në ‘një shtet të mafisë’ dhe vatër të krimit të organizuar, të trafikimit dhe radikalizmit, i cili po ashtu e shtyp komunitetin lokal serb, e planifikon dëbimin e tij përmes operacioneve sekrete ushtarake, dhe e rrezikon trashëgiminë e Kishës Ortodokse në vend”.
KIPRED theksoi se këto lajme synonin ndryshimin narrativ për Luftën e Kosovës, duke mohuar krimet e luftës së Beogradit në Kosovë dhe paraqitur serbët si viktima të NATOS dhe UÇK-në si një formacion ushtarak islamist”. /Insajderi.com