Kryetari i Kuvendit të Kosovës, Glauk Konjufca, në takim me përfaqësuesin e posaçëm të Bashkimit Evropian për dialogun Kosovë-Serbi dhe çështje të tjera rajonale të Ballkanit Perëndimor, Miroslav Lajçak, ka theksuar se rendi kushtetues, sovraniteti, integriteti territorial dhe pavarësia e Kosovës janë të panegociueshme.
Po ashtu është shprehur se dialogu me Serbinë duhet të rezultojë me njohje reciproke.
Kështu është bërë e ditur nga Zyra për media e Kuvendit të Kosovës, përmes një komunikate për media.
Ndër të tjera në takim është biseduar edhe për bashkëpunimin rajonal dhe perspektivën evropiane të Ballkanit Perëndimor.
Kreu i Kuvendit po ashtu ka vënë në dukje angazhimet parlamentare lidhur me miratimin e ligjeve dhe harmonizimin e tyre me ato të BE-së, duke ritheksuar se perspektiva e Kosovës është në Bashkimin Evropian.
Gjatë ditës Lajçak do të takojë edhe liderët e partive opozitare, përfaqësuesit e Organizatave joqeveritare dhe drejtues të Odës Ekonomike të Kosovës./Insajderi.com
