KQZ me kuorum të mjaftueshëm për zgjedhje, disa nga partitë ende pa përfaqësues, raporton T7
Zgjedhjet e jashtëzakonshme duket se janë të pashmangshme në vend.
Ndonëse ende nuk është marr një vendim nga Presidenti, për situatën e krijuar pas dorëheqjes se kryeministrit Ramush Haradinaj, në Komisionin Qendror të Zgjedhjeve, thonë se janë gati për të organizuar këtë proces.
Por, KQZ-në zgjedhjet e radhë duket se do ta gjejnë të pakompletuar në përbërje.
Kjo pasi që disa nga partitë parlamentare ende nuk kanë asnjë anëtar të tyre si pjesë e Komisionit Qendror të Zgjedhjeve.
Në përbërje të këtij mekanizimi mungojnë përfaqësues të PAN-it, pasi që AAK e NISMA, dekretin e presidentit e kanë dërguar në Gjykatë Kushtetuese.
Ndërkohë, LDK-ja dhe Vetëvendosja janë të përfaqësuar nga dy anëtarë. Ndërsa partitë minoriteteve kanë katër anëtarë.
Por për KQZ-në ky fakt nuk paraqet problem.
Sipas zëdhënësit për media Valmir Elezi, KQZ ka kuorum të mjaftueshëm.
Por, njohësit e çështjeve kushtetuese thonë se KQZ duhet të kompletohet me anëtarë.
Pavarësisht kësaj, KQZ është e gatshme për çfarëdo date që caktohet nga Presidenca për të organizuar zgjedhjet.
Zgjedhjet e jashtëzakonshme në Kosovë nuk janë gjë e pazakontë.
Të tilla ishin edhe zgjedhjet e kaluara, kur kryeministër u bë Ramush Haradinaj.
Kjo pasi që me një mocion mosbesimi ishte rrëzuar ish kryeministri nga radhët e LDK-së, Isa Mustafa.
