Organizata joqeveritare INPO reagon ndaj injorimit të vazhdueshëm të Kryetarit të Komunës dhe Kuvendit Komunal të Prishtinës për të prezantuar në takimet publike me qytetarë.
Komuna e Prishtinës, më 29 qershor 2018, ka mbajtur takim të përgjithshëm me qytetarë, në të cilin nuk ka marrë pjesë as kryetari i komunës dhe as anëtarët e Kuvendit Komunal, siç obligohen me ligjet dhe udhëzimet administrative në fuqi për transparencë komunale.
INPO sqaron se Ligji NR. 03/L-040 për Vetëqeverisjen Lokale, respektivisht, neni 68, obligon komunën që së paku dy (2) herë në vit të mbajë takime publike, në të cilat takime duhet të udhëhiqen nga përfaqësuesit e zgjedhur komunal. Rrjedhimisht, përfaqësues të zgjedhur në komunë janë kryetari i komunës dhe anëtarët e kuvendit.
Sipas INPo-s, në asnjë dispozitë të këtij ligji, nuk parashihet që të emëruarit politik, respektivisht drejtorët e drejtorive të mbajnë takimet publike, pasi që ata nuk janë përfaqësues të zgjedhur nga vota e qytetarëve.
“Tutje, sipas nenit 7, të UA (MAPL) Nr.01/2015 për Transparencë në Komuna, kryetari i komunës ka për obligim të organizoj takime më qytetarë me qëllim të informimit të drejtpërdrejtë me problemet me të cilat ballafaqohen qytetarët, si dhe të dëgjoj propozimet e tyre për zgjidhjen e çështjeve të ngritura, e që janë kompetencë e ekzekutivit të komunës. Gjithashtu, edhe statuti i komunës e obligon kryetarin që t`i udhëheq takimet publike me qytetarë”, thuhet në një komunikatë të INPO-s.
Në bazë të monitorimit sistematik të komunës së Prishtinës, INPO-ja, ka vërejtur se kryetari i komunës nuk merr pjesë në takime me qytetarë. Për më tepër, nuk e delegon as nënkryetarin e komunës, gjë të cilën e parasheh ligji.
