Zëdhënësja e Partisë Socialdemokrate, Natyra Kuçi, ka reaguar pas shkarkimit të Shkëlzen Gashit nga Albin Kurti.
Kuçi ka thënë se Kurti në deklaratën e tij të shkarkimit nuk ka dhënë asnjë koment rreth deklaratës së Shkëlzen Gashit dhe pyet nëse Kurti mund të tregohet një herë i sinqertë dhe të flas se çfarë mendon për raportin e Dick Martyt.
“Kurti po thotë që deklaratat e Shkëlzen Gashit e kanë shpërqëndruar opinionin publik nga punët e mira të qeverisë. Mirë. A ka ndonjë deklaratë Kryeministri për deklaratën e Shkëlzenit? A mund të tregohet i sinqertë një herë e të thotë se çka mendon me të vërtetë ai për raportin e Dick Martyt dhe trafikimin e organeve njerëzore?”, ka shkruar Kuçi.
Tutje zëdhënsja e partisë që drejtohet nga Dardan Molliqaj, thotë se heshtja e Kurtit rreth kësaj teme lë të kuptohet që Kurti pajtohet me Shkëlzen Gashin por që s’mund ta thotë një gjë të tillë publikisht.
“Apo, që po duket e vërtetë, heshtja e tij dhe anashkalimi i temës po lënë të nënkuptohet që ai pajtohet me Shkëlzenin, veç nuk mund ta thotë publikisht sepse del keq në opinionin publik. Pra, kur dikush ja nxjerr imazhin e vërtetë të qeverisë, përgjigja është të strukesh sa më mbrapa imazhit të mirë dhe ta heshtësh atë temë që të mos përfundosh sikur ai dikushi”, ka përfunduar Kuçi.
Kurti sot ka marrë vendim për shkarkimin e këshilltarit të tij Shkelzen Gashi pas deklarimeve të këtij të fundit rreth vrasjeve të civilëve gjatë luftës së fundit në Kosovë.
